Bon siman na tur nos lektornan…
Nos ta habri e siman aki ku nos kolumna di Karnaval 2023…
Durante henter e temporada di Karnaval diariamente nos lo kompartí informashon aktividatnan relashoná ku Karnaval…
Korant EXTRA pa e temporada aki tambe tin algun aktividat èkstra ku nos ta planiando i segun dianan ta bai nos lo anunsiá esakinan…
Awe nos ta kuminsá na anunsiá nos kampaña pa Inskripshon di Tumba 2023…
Nos kampaña ta duna bu e chèns pa por gana 2 pakete pa Red Carpet di Festival di Tumba…
Loke bo mester hasi ta fásil, buska e aviso den korant i kòrta esaki, yen’é i entregá esaki djadumingu awor na e stènt di EXTRA den Festival Center durante di Inskripshon di Tumba…
TIP: Awe e aviso ta den página 28…
Nos promé evento pa e temporada di Karnaval aki ta e transmishon di Inskripshon di Festival di Tumba ku ta tuma lugá djadumingu awor den Festival Center…
Mañan nos lo tin mas detaye riba e transmishon aki ku sigur lo ta karga ku kontenido ku lo pone ku sigur lo bo ke sigui e transmishon aki…
Fundashon Desaroyo di Karnaval Kòrsou a skor hopi bon djasabra ku e apertura di karnaval…
E organisashon a risibí palabranan di elogio tantu di esnan ku a bishitá e evento komo esnan ku a sigui esaki via televishon…
Nos sigur a disfrutá dje evento, úniko opservashon ku nos tin ta ku e órden di presentashon dje bandanan segun nos mester tabata otro…
Bo ta mira esaki sigur riba e manera kon públiko a reakshoná durante dje presentashon di bandanan…
E promé ta tras di lomba i awor e focus lo ta riba Festival di tumba Hubenil ku ta tuma lugá djasabra awor…
‘BoldStarz’ ku ta enkargá ku e organisashon dje festival ta trahando duru pa presentá un tremendo festival…
E 12 hóbennan ku ta partisipando ta ensayando e dianan aki…
Nos por a tuma nota riba retnan sosial ku e supladónan, trompetista i trombonista, ku mester a yega pa reforsá Excellence i Dolce Band a yega Kòrsou…
Ayera tabatin e apertura di e temporada di Karnaval di Bándabou ku un evento ku a tuma lugá na Tera Kora…
Manera nos por a tuma nota tabatin un públiko basta bon ku a asistí na e evento i a disfrutá di evento…
Djárason awor ta pendiente pa otro rueda di prensa di AMAK, kaminda nan lo bai duna e ultimo detayenan promé ku Festival di Tumba 2023…
Ma tuma nota ku djaweps nan ta bolbe bai Aruba pa promové e Festival…
Tin indikashon ku lo bai tin basta kambio pa loke ta trata personanan ku tabatin derechi di prekario pa Karnaval…
Ma komprondé di un fuente ku e aña aki lo tin mas hende ku no a paga i ku lo pèrdè nan derechi…
Tin algun sitio ku ta tereno priva tambe ku tin disputa riba nan ku ta hasi imposibel ku por pone stellage riba e terenonan…
Un di nan ku sigur nos a tende di dje ta e tereno grandi na Sta. Helena, einan tin un disputa den korte i segun informashon lo no permití pa hasi uso dje tereno…
Pa awe nos ta keda te aki, disfrutá di potrètnan di públiko ku nos a saka djasabra ultimo den Festival Center…
Te mañan ku Dios ke!…
