WILLEMSTAD.- Büró di statistik ta informá di e desaroyo di preisnan di último lunanan. For di sifra ku Ofisina Sentral di Statistik (CBS) a publiká, ta indiká ku e nivel di preis promedio a baha na luna di yanüari 2023 ku 1.8 porshento, kompará ku luna di desèmber 2022, na luna di febrüari 2023 e promedio a subi ku 0,4 porshento kompará ku luna di yanüari i na luna di mart 2023 e promedio a subi ku 0,1 porshento kompará ku luna di febrüari 2023.
Análisis di kada luna apart:
Nan ta bisa ku e sifra índise di preis pa konsumidó (CPI, “Consumer Price Index”) di Kòrsou a baha ku 1.8 porshento na luna di yanüari 2023 kompará ku luna di desèmber 2022, esta el a desaroyá di 117,5 na luna di desèmber 2022 pa 115.5 na yanüari 2023. Esaki gran parti ta motibu di bahada di e kategoria di konsumo di transporte i komunikashon (-11.8%), gasolin (-11.5%) i diesel (-19.4%).
Si kompará e periodo di e último 12 luna te ku yanüari 2023, ku mes periodo un aña anterior, ta resultá ku e averahe di preisnan di konsumidó a subi ku 7,5 porshento.
Desaroyo di preis luna di febrüari 2023 kompará ku luna di yanüari 2023
E sifra índise di preis pa konsumidó (CPI, “Consumer Price Index”) di Kòrsou a subi ku 0.4 porshento na luna di febrüari 2023 kompará ku luna di yanüari 2023, esta el a desaroyá di 115,5 na yanüari 2023 pa 115.9 na febrüari 2023. Esaki gran parti ta motibu di subida na luna di febrüari 2023 di e kategoria di konsumo di kuminda (1.4%) i di muebel i aparatonan doméstiko (2.4%).
Si kompará e periodo di e último 12 luna te ku febrüari 2023, ku mes periodo un aña anterior, ta resultá ku e averahe di preisnan di konsumidó a subi ku 7,5 porshento.
Desaroyo di preis luna di mart 2023 kompará ku luna di febrüari 2023
E sifra índise di preis pa konsumidó (CPI, “Consumer Price Index”) di Kòrsou a subi ku 0.1 porshento na luna di mart 2023 kompará ku luna di febrüari 2023, esta el a desaroyá di 115.9 na febrüari 2023 pa 116.0 na mart 2023.
Na luna di mart 2023 mayoria di e kategorianan di konsumo a subi ku eksepshon di kuminda (-1.0%) i transporte i komunikashon (-0.6%). E kambionan di preis mas importante pa luna di mart 2023 ta subida di bibienda (0.8%), muebel i aparatonan doméstiko (0.6%) i salubridat (0.6%). E kategorianan di konsumo ku a bira mas barata ta kuminda (-1.0) di kual batata, berdura i fruta (-9.5%); transporte i komunikashon (-0.6%) bou di kual servisio di transporte (-3.5%) a baha.
Si kompará e periodo di e último 12 luna te ku mart 2023, ku mes periodo un aña anterior, ta resultá ku e averahe di preisnan di konsumidó a subi ku 7,4 porshento.