WILLEMSTAD.- E dianan aki komunidat di Kòrsou ta eksperensiando un kalor enorme ku tin ta asotando nos isla.
Relashoná ku e fenómeno aki hopi mondi ta pega na kandela dor di e dam di kayente ku ta wòrdu kreá òf blachinan seku ku fásilmente por pega na kandela.
Ayera esaki tabata e kaso ora ku blachinan seku dor di e kayente a forma un kandela di shushi na e edifisio bieu kaminda ántes tabata Bestuurscollege na Pietermaai. Pagadónan di kandela a presentá na e sitio p’asina paga e kandela i evitá ku esaki por bira mas grandi i afektá otro edifisionan den bisindario. Ta un bista tristu di mira kon ta laga e edifisio para asina sin hasi nada na dje.
Na mart 2019, APC (Algemeen Pensioenfonds Curaçao) a tuma e edifisio aki over pa por remodelá e edifisio i hür esaki ku ministerio di Enseñansa, siensia kultura i deporte. E traspaso di e edifisio di gobièrnu pa APC tabata pa baha debe di prima ku gobièrnu tin na APC. Pero for di e dia ei, no a mira ningun moveshon di APC na e edifisio.
