Denise de Jongh Rekwest
No ménos ku 20 buki riba su nòmber i 16 ku el a publiká, Denise de Jongh Rekwest tabata invitado di nos programa e siman aki. Nos konosé Denise pa mas di 25 aña, kuminsando ku su kursonan di etikèt i pa tambe a kontinuá komo eskritor i publiká buki. Denise a kaba di skibi i publiká un buki riba enkargo di Stinapa di Boneiru ku na su turno ta bira e di 20 buki ku e ta skibi i publiká.
For di kuminsamentu
Kon bin Denise a disidí di kuminsá skibi buki? Esaki nos tabata poko kurioso pa sa. El a splika EXTRA Djasabra ku el a sigui estudio di Pedagogisch getuigschrift i einan nan a siña kiko por hasi pa yuda mayornan pa nan por traspasá e balor i normanan pa muchanan. E tabata manera un sirkulo visioso ku nan no por a sali afó. E momentu ei Denise tabata kumpliendo 10 aña ku Training & Consultancy, dunando lès di etikèt pa mucha i hende grandi, i el a bin riba e idea pa saka un buki. I asina el a kuminsá. E tempu ei el a bisa ta un buki so. Na hulandes ta 5 e tabata haña pa òpstèl i el a kere ku nunka e por skibi. Su yu Kaylee tabata den klas ku un hóben, kende su mama a bisa Denise ku e ta traha na un editorial i el a pidi pa wak e kuenta. Dado momentu nan a hañ’é masha bon mes i asina a Denise a saka su promé buki ku ta Kaylee i su primu ku fakansi na Kòrsou. “Mi no por a kere. E buki a bira un éksito i den 2 luna el a bende tur e bukinan (2000). Despues mi a haña petishon despues ku a evaluá i bai e buki drenta skol. I asina tin mayornan a kuminsá puntra pa un di dos buki. Mi a gusta henter e proseso, e trabou di traha ku ilustradó, traduktor esun ku ta revisá e teksto, i esun ku mas mi a gusta ta e produkto final. I asina mi a haña asina ‘leuk’ ku mi a purba ku un di dos”, segun Denise. I asina el a kontinuá, te awor aki e tin 4 buki den e seri di Kaylee.
Aseptá ku mi por skibi
Denise a sigui bisa ku siguiendo ku su skibimentu di buki, el a kuminsá ku Etikèt di norma ku balor, despues el a bin ku un buki strep, despues pa adulto di etikèt e porta pa éksito i dado momentu den siman di buki pa mucha tabatin e tema di transpòrt, i el a purba skibi algu. E ta kòrda di a mira un supmarino drenta haf (na Boneiru kaminda Denise ta biba) i e tabata unu koló kòrá i el a skohe pa skibi di supmarin ku a yama ‘Bin Bin bin sigui mi Submarin’. Tabata un buki ku muchanan a gusta masha. Asina el a aseptá pa su mes ku e por skibi.
Envolví otro outornan
Riba Denise su trayektoria komo eskritor i publisista, el a envolví diferente otro eskritor manera el a bisa EXTRA Djasabra. E ta kòrda ku un dosente na Boneiru a pidié pa saka un buki pe. I asina el a saka un buki Katia, ke konosé mundu di Ilviena Carolina. A bai bon i tur hende a gusta, Denise mes a gusta e trabou i asina mas hende a gusta su trabounan te dado momentu el a lanta Rekwest Publishing. Te ku awor, el a bisa el a publiká 16 buki pa diferente outor di Kòrsou, Aruba Boneiru i asta na Hulanda. Tin persona ku tin nan soño pa saka nan buki, òf tin ta eskritornan manera Diana Lebacs i tin kompanianan ku ta dun’e enkargo pa publiká un buki.
Lanta sin tata
Denise komo outor ta konsentrá mas tantu riba buki pa mucha. El a saka pa hende grandi tambe ku tabata “lanta sin tata”. E buki ei tabata un reto pa Denise i tambe e ta un tabú ya ku ta algu ku di dje mes ku a lanta sin tata. No tabata fásil pero el a hasié pero tabata su mishon ku e mester a kumpli kuné. Otro buki pa hende grandi ta e Business Etiket e porta di éksito, ku ta unu pa adulto. E ta saka buki pa adulto pero Denise ta gusta mas skibi pa mucha. E ta gusta mira kon e muchanan ta biba den e kuenta, e historia, kon nan ta reakshoná i esei ta loke ta motiv’é mas.
Inspirá dor di hende i situashon
Denise komo eskritor ta hinka su mes den e historia. El a bisa ku e ta keda inspirá pa Kaylee i muchanan. E ta purba hinka su mes den e mundu di e mucha. Kasi tur outor ta skibi algu ku nan mes a eksperensiá, masha poko ta skibi fikshon. Den su kaso mitar ta realidat i e sobrá ta fikshon. Hopi bia e eskritor ta wòrdu inspirá dor di hende òf kosnan ku ta pasa, Denise a bisa nos.
Un terapia
Den tur e bukinan ku Denise a skibi, ta interesante pa sa kua ta esun ku mas a inspir’é. El a bisa nos ku ta poko difísil pa kontestá. Si e ta referí na e buki di mas leuk, esei ta su primu esta di Kaylee ku a bai ku fakansi serka su primunan. Lanta sin Tata a dun’é hopi satisfakshon pasobra e por a yuda tur otro ku tambe a lanta sin nan tata. E buki tabata un terapia pe i el a yuda otronan. E buki ei tabata su propósito, e no tabata fásil, e no sa kon hende lo a reakshoná pero e reakshonnan tabata sumamente positivo.
Etikèt ta kontinuá
Denise a kuminsá dunando kursonan di etikèt. Tabata kursonan ku semper ta yen yen. No solamente etikèt di kon tene kuchú ku fòrki, pero etikèt di negoshi i hopi mas. Pero kiko awor, e ta sigui ku e kursonan aki mirando kuantu trabou e tin ku skibimentu di buki? Riba e pregunta aki Denise a bisa ku e kos aki ta den dje i no ta bai nunka. Ketu bai ora el a mira algu ku no ta pas, e ta koregí. E ta den dje i e ta sigui ku su kursonan di etikèt. Tambe e ta sigui ku su trainingnan, ounke tu esakinan ta tuma hopi tempu.
Skibi buki ta tuma tempu
Skibimentu di biki ta tuma hopi tempu. Ku su promé buki el a tuma 9 luna. E ta kòrda Pim Elisabeth a bisa ku a dura 9 luna pa e beibi a nase. I mayoria ta 9 luna pero tur kos ta dependé. Si e buki ta mas simpel kisas 6 luna. El a yega di saka 4 buki di turismo pa skolnan i a dura 5 luna pasobra tabatin preshon di tempu. E ta gusta tuma su tempu pasobra ta henter un tim tin tras di un buki i no por pone preshon.
Ta masha dushi pa skibi
Un kos ku Denise sigur ta kontinuá kuné ta skibi buki pasobra e ta haña esei algu masha dushi pa hasi. E tin satisfakshon ora e por kumpli ku un hende su deseo pa bira outor. Pero pa bira outor bo mester tin talento, bo mester bai kursonan por ehèmpel si ta den papiamentu bo ta bai skibi, mester siña e papiamentu bon. I pa bira outor bo mester por gusta lesa tambe pasobra no por bira eskritor si bo mes no ta lesa. Bo mester lesa hopi pa wak estilo di otronan. Den su kaso e ta gusta yuda otronan realisá nan soño i trese mas buki na nos dushi papiamentu pa nos muchanan i hende grandi. Echo ta ku no ta pasobra Denise ta skibi i publiká, e ta hasié ku tur buki. El a bisa ku promé e tin di wak e manuskrito pa mira ku e ta kai bou di kriterionan di Rekwest Publishing. Denise ta skibi mas tantu den papiamentu pero el a yega di saka buki na Hulandes i asta Papiamento pa Aruba. Tambe e tin buki na spañó i ingles. E tin su traduktornan profeshonal ku ta hasi e parti aki.
Tempu ta bula, ya Denise tin 36 buki
Tirando un bista bèk di for di tempu el a kuminsá te awor, Denise nunka por a keda ku e lo ta te aki. El a keda ku ta un buki e lo a skibi i awor e tin masha hopi riba su nòmber. Denise ta kòrda un kombersashon ku Diana Lebacs kaminda e ta referí na tantu buki ku Diana tin (38 e tempu ei) i Diana su reakshon ta ku mirando e spit ku Denise ta bayendo kuné, un djis e lo pas’é na kaminda. Awor aki Denise tin 36 buki ku e por drei wak patras riba dje miéntras ku Diana a yega 45 buki.
Mantené nos kultura bibu
Denise ta haña hopi importante tempu ku e i Kaylee tabata lesa buki, tin bia nan no ta komprondé pasobra ta bukinan ku ta bin di Hulanda òf Merka. Pero awor e ta skibi den situashon kaminda e mucha ta rekonosé su mes. Esei ta hopi importante i asina por stimulá muchanan pa lesa mas. Ora e buki ta atraktivo, esaki ta masha importante pa e mucha. Ultimo 3 aña e ta purba pa pone atenshon riba nos kultura. El a saka e promé buki ku ta Papi tin Kolibrí. Su kasá a yega di haña Kolibrí i nan a laga un kurandero bin i el a wak e proseso di skibi kolibrí. El a hasi investigashon i papia ku kuranderonan. E ta parti di nos kultura ku no por bai pèrdè. Pero tambe tin esun di Yerba ku yama Bebe bira Bon. Den dje por haña yerbanan i nan uso. E ta siña e muchanan pa bebe te di yerba. I awor aki e tin esun nobo ku tabata riba enkargo di Stinapa. El a haña enkargo pa saka un buki riba mata i yerbanan kurativo. Ta yerbanan ku por haña tur kaminda. El a entrevistá 5 kurandero na Boneiru. Tambe el a entrevistá yerberonan. I den e buki aki ta haña kon ta usa e yerba, kiko e por kura i ta pone presis den detaye kon ta trata yerba, kuantu blachi, kuantu kòpi pa dia, pa siman. E buki aki ta optenibel na Boneiru i pronto e lo ta na Kòrsou. E buki aki a tuma 2 aña, ounke e mester a tuma mas tempu pasobra e mester a traha asta den wikènt. El a traha ku sientífikonan tambe. Ta basta investigashon i e mester ta sigur di kiko ta skibi. El a pone basta potrèt den e buki pa asina hende por mira esaki. I pa esun ku ta duda semper por bai serka e yerbero òf kurandero. Denise su konseho ta pa semper bai dòkter promé i si no keda kla e ora ei ta rekomendá bai un kurandero. Denise ta tene nos kultura bibu. E ta inkorporá nos kultura den su bukinan. E ta spera ku asina aki e por inspirá nos hóbennan pa sigui ku nos kultura. Na Boneiru awor aki tin 12 kurandero, na Aruba tin 4 i na Kòrsou ta 4 so tin tambe. E kosnan aki no por bai pèrdí i mester dokumentá nan. Asina aki Denise ke yuda duna aporte.
Importansia di lesamentu
Riba e importansia di lesamentu Denise a bisa EXTRA Djasabra ku tur anochi promé bai drumi, 10 minüt ta bon pa mayornan lesa ku nan yu. E ta duna efekto relahante pa e mucha, e ta drumi mas dushi. I ta importante pa nos komo mayor lesa pasobra e mucha tin di wak su mayor lesa pe inspirá. E ta importante pa na skol ora tin di traha òpstèl i asta den ‘redactie’.
Kuentanan oral
Tambe e tin gana di sigui traha riba kuentanan oral. El a publiká un buki na nòmber di Diana Lebacs ku yama Pasenshi/Geduld/Patience/Paciencia. E ta un kuenta oral di Boneiru Rinkon. Diana tabata bai skol hopi i lesa pa muchanan. I esaki ta e último buki ku Diana a pidi Denise pa publiká pe. Tin un otro outor ta bai kuminsá ku algu asina aki pero ta mas importante pa mas outor bai den e direkshon.
Kiko tin na kaminda
E tin algun proyekto na kaminda entre otro di kultura. Tin diferente petishon, i tin 4 proyekto pendiente. I tin mas i mas na kaminda. Denise ta biba na Boneiru pero e ta bin di Kòrsou i e ta stima Aruba. I finalmente Denise a yama danki na esun ku promé ku a kere den dje ku su buki i esei ta Daniel Hodge. Madrina i Padrino tambe di su promé buki ta Valesca Diaz i Maurice Adrians. Publiká buki no ta fásil ni barata i nan komo eskritor/outor mester di yudansa i spònsernan pa por sigui hasi esaki.
