Shofùr di 80 aña a fayesé
ORANJESTAD.-Awe despues di 4’or atardi Sentral di Polis a dirigí un patruya di Noord, ambulans ku urgensia maksimo pa un aksidente hopi serio ku a tuma lugá na altura di e supermerkado NG i e restorant Yen Yen situá na Kamay. Na yegada di e promé unidat nan a mira dos outo involukrá den e aksidente. Un outo marka Nissan, modelo Almera kolo shinishi numera A-24490 i un Honda, modelo CRV, kolo kora numera A-52927, asina Kuerpo Polisial di Aruba ta informa.
Lamentablemente e personal di ambulans no por a hasi muchu pa un di e shofùrnan involukrá den e aksidente. Pa 5’or Dr. Texier a konstatá morto di e kabayero Marco Marceliano TROMP, nase na Aruba dia 17 yüni 1943 di 80 aña di edat.
Slachtofferhulp, BFTO, spesialisá di tráfiko tambe a bin na e sitio di e aksidente pa hasi nan investigashon i brinda sosten.
Esaki ta bira e di tres morto den tráfiko pa aña 2024. Un mensahe pa tur outomobilista pa manehá trankil, komportá i sigui reglanan di tráfiko. Kuerpo Polisial Aruba ta manda palabranan di kondolensia pa e famia di e víktima.
