WILLEMSTAD.- Minister Charles Cooper ta persistí den retiro di direktor finansiero di Fundashon Kas Popular (FKP), Peter Bongers. Despues di un konseho negativo di parti di konsehero “corporate governance”, SBTNO e minister ta informá ku e ta desviá for di e konseho aki.
Den su karta Cooper ta bisa ku e ta konkluí ku e relashon di trabou ku Bongers komo gerente di FKP ta seriamente afektá. Pa e motibu aki tambe e ta di opinion ku e por duna Hunta di Komisario di FKP aprobashon pa duna Bongers retiro komo direktor finansiero di FKP i terminá e kontrato ku su persona.
Segun Cooper konforme lei por terminá un kontrato (“overeenkomst van opdracht”) na tur momento sin ku mester motivá esaki. Sí mester respetá e palabrashonnan finansiero den e kontrato i pa e motibu aki Cooper ta di opinion ku a base di petishon di e Hunta di Komisario e ta duna pèrmit pa e retiro miéntras ta paga Bongers un suma ekivalente na 5 biaha e salario ku a palabrá ku FKP ta pag’é.
Cooper ta splika ku den su evaluashon pa duna retiro na Bongers el a tene kuenta ku konforme deseo di parlamento, mester trese kambio drástiko den e maneho di bibienda popular. Segun e minister e no por trese e kambionan den maneho aki di forma efisiente i dinámiko si den e fundashon tin un kantidat di konflikto ku ta stroba e proseso aki.
E minister ta bisa den su karta ku motibunan di e Hunta di Komisario pa kore ku Bongers ta na promé lugá konfliktonan entre e direktor finansiero i personal di FKP i entre Bongers i miembronan di e tim di maneho inkluso e sindikato SEBI. Kontrali na SBTNO, Cooper ta indiká ku e ta di opinion ku por spera di un direktor finansiero statutario ku e ta un profeshonal, ku e tin e abilidat pa funshoná na un manera konfiabel i sa kon pa atendé ku esnan ku ta kai bou di dje.
Kontrali na loke SBTNO ta opiná Cooper ta bisa mas aleu ku un direktor finansiero mester duna liderato i no ta igual na un otro trahadó ku mester haña oportunidat pa e mehorá su mes. Tambe Cooper no ta di akuerdo ku SBTNO ku ta tarea di e Hunta di Komisario pa vigilá ku e relashon di trabou entre e direktor finansiero i e trahadónan ta mehorá.
“E direktor finansiero aktual a demostrá ku e no ta kalifiká pa e funshon di direktor finansiero statutario di FKP.” E minister ta sigui bisa ku manera e Hunta di Komisario ta konfirmá, e desishon pa duna Bongers retiro no ta basá riba e relashon di trabou entre e dos direktornan di e fundashon i/òf nan diferensia di opinion riba envolvimentu di e kompania HD&M di Rudney Garmers i pa kua èks promé minister kondená pa aktonan froudulento, Gerrit Schotte ta traha, den proyektonan di FKP.
Segun e Hunta di Komisario tempu ku e dos direktornan tabata atendé bon ku otro ainda, Bongers no tabatin opheshon kontra e relashon di trabou entre FKP i HD&M. Ta ora ku e intenshon di retiro a subi mesa Bongers lo a lansa su opheshonnan.
Esaki pa Cooper ta muestra di e falta di integridat i konfiabilidat di Bongers. Pa e minister e dudanan grandi den konfiabilidat di Bongers no a kita i e ta mustra ku miéntras SBTNO no ta rekonosé ku e direktor finansiero ta usa e relashon di trabou entre su persona i direktor, Arthur Con komo motibu pa dun’é retiro, e Hunta di Komisario ta bisa klaramente ku esaki ta motibu pa retiro.
Otro ehèmpel ku Cooper ta usa pa tilda Bongers di no ta konfiabel ta lèkmentu di informashon konfidensial di FKP. Ta trata entre otro di informashon tokante e relashon di trabou entre FKP i HD&M ku segun e minister asta e èks gerente di Wechi Management Company ke entre tantu tambe a terminá relashon di trabou kuné, a skùif den sapatu di Bongers.
Alabes ta kulpa Bongers di a lèk informashon di hinka kobransa di 19 mion florin ku FKP tin depositá riba kuenta di GiroBank den un proseso di “incasso”. Bongers segun Cooper tabata na promé instante di akuerdo ku esaki pa despues kontra konseho di Hunta di Komisario bai den publisidat riba e asuntu aki.
Cooper ta finalisá su karta bisando ku a entregá un keho na Ministerio Públiko kontra Bongers. E keho entregá ta sinembargo sin nunka Bongers a haña kopia di e rapòrt ku a traha kontra su persona riba lèkmentu di informashon te pa e por a defendé su mes riba e rapòrt aki.
