Promé ku reuní riba rapòrt SOAB
WILLEMSTAD.- Pa frakshon di partido MAN den parlamento no ta aseptabel ku ta yama un reunion di Komishon Sentral riba e investigashon di ofisina di akountent, SOAB na Landsontvanger miéntras ku ta bai hasi 1 aña ku minister di Finansa, Javier Silvania (MFK) ta nenga di bini parlamento pa kontetestá preguntanan riba su desishon pa duna 3 miar florin na eksonerashon di debe di impuesto.
Asina e frakshon ta informá presidente di parlamento, Charetti America-Francisca (MFK) den un karta fechá 28 mart. Silvania dia 25 mart a manda kopia di e rapòrt di SOAB pa parlamento huntu ku un karta ku e petishon pa yama un reunion di Komishon Sentral pa e informá parlamento mas aleu riba e tópiko.
No por ta asina ku ta konvoká un reunion nobo riba impuesto/Ontvanger i Silvania, apesar di basta rekordatorio ku frakshon di MAN a manda, ta nenga di bini parlamento pa kontesta preguntanan di un reunion suspendé ku un tópiko similar, e frakshon ta bisa. Den e kuadro aki frakshon di MAN den su karta ta hasi 2 petishon na presidente di Parlamento.
E promé ta pa pone kontinuashon di e reunion di 11 mei 2023 riba agènda di forma ku Silvania por duna kontesta riba e preguntanan di parlamento tokante su desishon pa duna eksonerashon di mas ku 3 miar florin na debe di impuesto. E di dos petishon ta pa den e reunion ku Silvania a pidi riba e rapòrt di SOAB, laga Ontvanger, Alfonso Trona i hefe di Inspekshon di Impuesto, Jamila Isenia ta presente pa duna informashon di nan banda i tambe kontesta preguntanan di miembronan di parlamento.
“Loke ta pasando aki ta kreashon di deskonfiansa total den nos institutonan di impuesto kual ta e kurason di gobièrnu. Ta basta tempu kaba tin un disputa entre minister Silvania i hefenan di servisio di impuesto. Frakshon di MAN ke klaridat i ta desea pa e hefenan ta presente den sala pa asina hasi pregunta na nan i risibi informashon direkto for di nan.”
Finalmente frakshon di MAN ta bisa den su karta: “Komo presidente di parlamento bo persona tin e deber di garantisá un funshonamentu optimal di parlamento komo e órgano demokrátiko representativo di pueblo. No por ta asina ku minister di Finansa te ku dia di awe ta keda sin kontestá preguntanan hasí den reunion di 11 di mei 2023 riba un tópiko di impuesto asina importante i ta rekurí pa pidi otro reunion riba e topíko di impuesto.”
