Mc William:
WILLEMSTAD.- Minister di Finansa, Javier Silvania a hasi akto di presensia den parlamento djaweps último pa papia riba kumplimentu ku norma i standard internashonal i transparensia den kuadro ku kuadro di kumplimentu ku reglanan fiskal internashonal. Esaki tabata motibu pa lider di frakshon di partido, Giselle Mc William un biaha mas a puntra klaridat ki dia Silvania ta duna transparensia na parlamento i klaridat riba kua base legal el a usa pa duna eksonerashon pa 3 miar florin di debe di impuesto.
“Mi ke sali for di e bai bin di ken ta yama reunion i ken ta dispuesto bin reunion òf laga. Ta bai hasi 1 aña ku Silvania no ke bin parlamento kontestá riba preguntanan relashoná ku e 3 miar florin na eksonerashon di debe di impuesto”, Mc William a bisa.
El a mustra ku Silvania den kuadro di kambio di leinan fiskal lokal ta papia di transparensia internashonal i kuadro hurídiko pa kumpli ku norma i standard internashonal. Sinembargo e ta hui pa 1 aña kaba pa duna parlamento kontesta riba e 3 miar florin.
“Nos ke broma internashonal i sende lus pa nos bria i mustra ku nos ta transparente. Mi pregunta ki dia Silvania ta transparente ku parlamento pa e kuadro hurídiko di e 3 miar florin ku a eksonerá.”
Segun Mc William ta trata entre otro di “friends and family” di e minister ku a probechá di e eksonerashon aki pa mas ku 16 mion florin. Tambe tin doñonan di hotèl parti pariba di Kòrsou ku a haña eksonerashon di debe di impuesto di 8 mion florin, otronan 5 mion florin i bankonan tambe pa miónes di florin.
“Ki dia e minister ta duna transparensia i splika kua te e kuadro hurídiko ku el a usa pa duna 3 miar florin na eksonerashon ku ta sèn di pueblo ku por a usa pa subi penshun di behes, aria sosial i enseñansa. Ta inaseptabel ku Silvania ta papia di transparensia i kuadronan hurídiko internashonal i den su propio pais e no por duna kuenta i rason.”
Mc William ta bisa den pasado Silvania a laga sa ku ta presidente di parlamento mester yama reunion pa despues presidente di parlamento bisa ku ta minister mester indiká ki dia e por bini parlamento. “Awor si mi ke un kontesta.”
Presidente di parlamento, Charetti America-Francisca un biaha mas a primintí ku pronto lo yama kontinuashon di e reunion riba e 3 miar florin, pero esaki no tabata sufisiente pa Mc William ku a reklamá ku ta na vários okashon el a haña e promesa ku pronto lo pone e reunion riba agènda. America-Francisca a bisa ku pa djabièrnè e lo tin un kontesta.
Silvania a presentá djaweps den parlamento ku un proposishon pa trese kambio den e leinan di impuesto pa por kumpli adekuadamente ku norma i standard internashonal di e “global forum on transparency and exchange of information for tax proposals” ku ta un divishon di OESO (Organisatie voor Economische Samenwerking en Ontwikkeling”) .
Tambe e proposishon di lei ta pa koregí vários omishon tékniko legal i tambe pa implementá maneho ku ta apliká den práktika den diferente leinan di impuesto. Kòrsou ta miembro di e “global forum” ku ta evaluá paisnan miembro pa sigurá ku implementashon di e normanan internashonal pa transparensia i interkambio di informashon ta kompletu i efektivo, Silvania a splika.
Den último informe Kòrsou a risibí un determinashon ku ta “not in place” i a pone Kòrsou riba lista shinishi. Pues Kòrsou no ta kumpli ku e kuadro legal pa garantisá ku implementashon di e normanan internashonal pa transparensia i interkambio di informashon ta kompletu i efektivo.
Segun Silvania ora parlamento pasa e kambionan den lei Kòrsou lo pidi un evaluashon nobo ku e intenshon pa baha Kòrsou for di lista shinishi loke tin konsekuensia positivo pa atraé aktividat ekonómiko internashonal i negoshá i sera tratadonan fiskal.
