Klaridat: Bai inspekshon di belasting pa hasi petishon
WILLEMSTAD.-E echo ku e hende ku suèldu mínimo, meskos ku un persona ku ta kobra solamente AOV òf ònderstant por pidi dispensashon pa e belasting pa kue sushi no ta un fabor ku minister di Finansa a krea, esaki ta pará den e lei for di momentu ku a kuminsá ku kobramentu pa kue sushi basta aña pasá. Na palabra minister Javier Silvania riba preguntanan di EXTRA dikon ta duna hende ku ta kobra suèldu mínimo tambe dispensashon di e pago pa kue sushi di 35 florin.
Den un aviso den EXTRA por tuma nota ku hendenan ku ta kobra suèldu mínimo por apliká na Ministerio di Finansa pa bini na remarke pa haña dispensashon. Ta konosí pa algun aña kaba ku penshonadonan ku ta kobra solamente AOV tambe ta haña dispensashon di e belasting pa kue sushi (Selikor). EXTRA a puntra minister di finansa si akaso e desishon aki ta nifiká ménos entrada pa Selikor/gobièrnu, esaki teniendo na kuenta ku un grupo grandi den merkado laboral di e komunidat aki ta kobra suèldu mínimo.
Minister Silvania a splika EXTRA ku e lei ku ta trata e gastu pa kue sushi, for di un prinsipio ta indiká bon kla ku hendenan bou di sierto kondishon por bini na remarke pa haña dispensashon. E problema ta ku ora un hende apliká pa dispensashon e no ta haña kontesta nunka òf ta tarda masha hopi mes. Pa kolmo hopi bia ta manda e hende di kashi pa muraya debí ku despues di 10-10-10 no tabata kla na unda mester bai pa pidi e dispensashon. Awor ta publikando ku ta na Ministerio di Finansa mester bai pa hasi petishon. Echo ta tambe ku a hasi petishon pero nunka no a atendé e petishon pasobra e trahadó no por a atendé tur e petishonnan, pasobra ministerio Finansa no ta e adrès korekto pa atendé dispensashon. Pues asina siudadanonan tabata bai Selikor sin keda kla, i meskos tabata bai Aqualectra sin por keda kla i tambe na Ministerio di Finansa pa puntra.
E mandatario a sigui bisa ku el a pone tur hende huntu, loke ta nifiká hendenan di SOAW, SVB, Selikor, Aqualectra, servisio di impuesto i departamentu di finansa pa yega na palabrashon kua ta e manera práktiko pa atendé ku dispensashon manera lei ta indiká. Ta nesesario pa atendé ku petishonnan ku a drenta durante di último añanan na un manera práktiko.
Kiko a palabra! Tur hende ku ta kobra ònderstant, SOAW ta manda e lista ku e nòmber di e hendenan aki i asina outomátikamente nan ta haña dispensashon. Pues e hendenan ei no mester hasi petishon i pa un ámtenar bai kontrolá un pa unu. Ta hopi trabou sin nodi. Esei ta un solushon práktiko. Meskos ta konta pa e hendenan ku ta kobra solamente AOV. E file ei ta bini di SVB i asina e grupo ei tambe ta kla mesora.
Pa esnan ku si mester hasi petishon Ontvanger ta pone riba website un formulario pa yena. Minister Silvania a regla ku ta inspekshon di belasting ta atendé e petishon. Esei ta mas fásil pasobra inspekshon por chek si ta bèrdat e shon ta kobra suèldu mínimo òf e tin mas entrada. Otro hendenan ku mester hasi petishon sa ku for di awor mester bai inspekshon di impuesto pa hasi petishon.
Minister Silvania ta enfatisá ku no por papia di ‘derving’ pasobra for di momentu ku a traha e lei a indiká ku e hendenan bou di sierto kondishon por haña dispensashon. Gobièrnu nunka no por a konta ku e sèn pasobra e gruponan ei niun momentu no mester a paga. Den práktika a sosodé ku tin hende a hasi petishon pero no a haña kontesta, otronan no tabata sa mes ku nan por pidi pa dispensashon, pues e hendenan ei a keda ku debe di belasting habri. Echo ta ku Ontvanger i Aqualectra no tabata kobra e hendenan ei. A tuma e sèn di esnan ku a pag’e!
E problema ta ku tin hendenan pober den e pais aki ku tin debe di algun mil florin den bukinan, na debe di belasting pa kue sushi ku nan no tin moda di paga. Ku e akshon aki minister di finansa ta logra ku a limpia e sistema. E hende ku debe pa kue sushi ku no por a paga i no a logra haña e sèn di 10 aña pasa i 15 aña pasá no a kobra a hende, awor no por kobr’e den un tiru.
