Anan Striker i Omar Martha
Dia 14 di desèmber awor ta habri un eksposishon na Instituto Buena Bista titulá “Dog is my Pilot”. E artista tras di e eksposishon aki ta Anan Striker ku aktualmente ta Artist in Residence na Instituto Buena Bista. Huntu ku Omar Martha a duna un splikashon di e eksposishon i tambe kiko hóbennan por spera di Instituto Buena Bista ku por sierto a hasi su eksigensianan pa permití un hóben studia arte serka nan, un tiki mas fuerte. I esaki tin su motibu i su bentaha.
Inspirashon
Anan Striker ta Beeldende Kunstenaar. Segun Anan a splika djasabra, e ta na Kòrsou despues di 12 aña. E ta na Kòrsou pa entre otro algun tayer na studiantenan di IBB i den e kuadro aki tambe e tin un eksposishon ‘Dog Is My Pilot’. Esaki tambe ta su presentashon final di su periodo aki na IBB. E ta un referensia na e bùsnan ku ta kore ku e bòrchi riba nan “God is My Pilot”. El a tradusí esaki den ‘Dog is my Pilot’ entre otro teniendo na kuenta e blaf kontinuo di kachó unda ku bo bira. Esaki ta e punto di salida di e eksposishon. E inspirashon aki Anan a haña aki na Kòrsou ku el a kalifiká komo un isla ku e ta hopi gradesido na dje, ku masha bunita inspirashonnan. El a bisa ku kisas komo e no ta di Kòrsou, esakinan a hala su atenshon rápidamente. El a topa hopi kos na Kòrsou ku a inspir’é.
Arte diversifiká
Loke por spera den e obranan di e eksposishon segun Anan ta hopi diversifiká. Lo tin pintura, video, oudio i tambe un presentashon djaweps 14 di desèmber. El a duna tayernan na e studiantenan di iBB i algun di nan trabounan lo ta den e eksposishon. Tambe el a hasi algun kolaborashon ku e studiantenan, asina Anan a konta djasabra.
Despues di 12 aña
El a skohe pa bin Kòrsou. E tabata na Kòrsou 12 aña pasá komo stazjèr na IBB i ta einan e amor a nase. Su focus a keda i pa e por presentá un obra aki. Manera el a bisa for di 12 aña pasá un pida di su kurason a keda Kòrsou i awor ta un dushi sentimentu pa e por ta na IBB atrobe.
Libertat
Anan ta un eskultor outónomo. Ta su forma ku e mes a skohe i niun hende ta bisé kiko pa hasi. E tin e libertat i e idea ku e haña e ta skohe e medio pa hasié, sea ta pintura, fotografia i kiko e ta kere ta pas mas mihó. I p’esei den e eksposishon por mir’é ku el a skohe netamente e medio ku e ta kere ta pas pa kada un di e obranan.
Si bo ta kere den dje, bai pe
Anan no ta duna lès den arte na HHulanda pero e ta duna tayernan òf ta wéspet durante di lèsnan manera el a hasi awor kai na IBB. E ta haña bunita di por pasa su eksperensia over na e generashon nobo. I komo artista e konsehá esun ku ke bai e direkshon aki pa hasié. E ta un profeshon úniko i no un hòbi. E tin asina tantu libertat i bo lo hasi algu ku bo gusta. Kisas e ta duna sentimentu insigur di un chèns i p’esei tin bia por sinti serka studiantenan ku nan tin miedu di bai e direkshon ei, pero si bo hasi bo bèst i kere den dje bai pe. Arte bo ta nase kuné, e ta un sentimentu i si e ta fuerte sufisiente, e ta logra sigur di un banda òf otro. I den su kaso awor despues di 10 aña e ta sinti ku su pianan ta bon riba suela. Nos tei, manera Anan a bisa. E ta kere tur lo por basta nan ke.
Artista residensia
Omar Martha dosente i mènedjer di Instituto Buena Bista a konta Djasabra di kiko ta nifiká traha ku e artistanan aki for di eksterior. IBB tin 4 programa di residensia aktualmente. Tin esun di Anan ku ta aden ku ta e Mondriaan Fonds ta paga pa esaki i ta di artistanan di Hulanda òf ku ta biba òf traha na Hulanda i nan ta bin Kòrsou pa un periodo di 4 luna. E artistanan aki segun Omar, no mag di bin ku nada trahá for di Hulanda i tur e trabounan di arte ta krea na Kòrsou i hopi bia basa riba eksperensia ku e artistanan tin na Kòrsou. Ta un bista nobo di kon un artista ku no ta di e konteksto di Kòrsou ta eksperensiá Kòrsou i ta krea inspirashon i trabou nobo kada 4 luna. Den e periodo ei tambe nan tin di duna lès na e studiantenan di IBB sikiera un tayer di 2 siman i asina e studiantenan ta siña algu nobo. Den kaso di Anan e no ta simplemente un artista pero e ta un T-Jockey esta e ta usa kasèt. Esaki tambe ta algu nobo pa e studiantenan. E studiantenan ku interes por bai siña serka dje i por bai siña kon ta traha ku kasèt. Esei hopi bia nan ta buska di artistanan. No tur tin mesun afinidat pa traha ku hóben pero ta great pa artistanan mustra ku tin variedat den loke nan ta hasi i pone pa studiantenan siña.
Amplia konosementu di e studiante
Banda di e artistanan ku ta bin for di Hulanda, Omar a splika Djasabra ku tin e oportunidat pa sobrá di mundu tambe. Nan ta bin pa periodo mas kòrtiku i tin programa pa artistanan lokal tambe. Mas aleu IBB tin programa di film kaminda ta invitá un persona sea dirigí òf skibi pelíkula den region di Karibe, un persona ku ta na kuminsamentu di su karera i huntu ku e studiantenan ta traha pelíkula. Antes ku tabatin Curaçao International Film Festival Rotterdam, tabata hasié den kooperashon ku nan. IBB tabata traha e pelíkula i ta bai e festival promé. I asina semper tin un pelíkula trahá na Kòrsou i e studiantenan di IBB tin e podio ei tambe pa nan mustra kiko nan por. Tin e direktor di afó pero tin esun lokal tambe. Hopi studiante a hasi praktikamente tur kos ku tin di hasi den produkshon di e pelíkula, esta aktua, krea vestuario, traha tras di kámara i tur kos tambe di produkshon. Asina e studiantenan ta siña i eksperensiá kiko ta publiká e pelíkula i sinti e loke hende ta pensa di dje. Esaki ta un base pa e studiantenan amplia nan mes. Nan ta eksperensiá di hende internashonal tambe. Hopi artista internashonal i asina amplia e konosementu di e studiantenan.
Rekerimentu mas skèrpi
Pa loke ta interes di studiantenan pa studia arte na IBB, Omar a splika Djasabra ku e no por bisa ku e kantidat ta krese pasobra nan a kambia nan rekerimentunan. Loke si ta un fluho kontinuo di hóbennan. Kòrsou ta un isla kreativo i tin hopi hende ku a habilidat artístiko i kreativo pero tambe nos isla no ta kere den e parti artístiko i kreativo. Kisas tin hopi hóben ku e gana artístiko ei pero ta tende pa bai den otro direkshon. IBB tin 17 aña ta pidi mayornan pa sostené nan yunan den loke nan ke studia. Tin sèn den ser un artista pero e yu mester di sosten pa sigui padilanti. E kantidat di hende disponibel pa bin IBB semper tei. Pero dor di sierto eksperensia di personanan ku ke bai òf ta bisa di ta bai i no ta bai, nan a hasi mas skèrpi nan rekerimentunan di atmishon. Tin ‘opdracht’ ku e hóben tin di traha promé haña akseso pa studia na IBB. Antes tabata tene un kombersashon ku e hóbennan pero esei tòg no ta resultá. Pa enfatisá e seriedat, nan a bin ku un tarea ku e hóbennan tin di hasi i entrega, i dor ku nan a hasi poko trabou pa drenta e skol, e ta un estímulo pa nan drenta e skol sigur.
E eksposishon ta habri dia 14 i ta dura algun dia ounke for di awor lo no por bisa esei. Mayoria di su trabounan lo keda visibel den e eksposishon den Instituto Buena Bista. E eksposishon ta habri 7 or di anochi na IBB den kurá di Klínika Capriles i un i tur ta bon biní.
