WILLEMSTAD – Den oranan di mainta outoridatnan polisial mester a akudí ku urgensia den Breedestraat Punda pa un kaso di atrako estilo ‘hit and run’. Dos hòmber riba un skuter mester a kore yega na e pakus Milano i drenta bati e kashinan di vitrina den kual tabatin oro i bai ku esakinan. A hasi uso di un mukel pa kibra e glasnan. E atrakadornan a logra bai ku un kantidat grandi di oro. Despues nan a bati retirada riba skuter den direkshon di Skalo. Den e área di Berg Altena polisnan a konsentrá pa buska a kriminalnan. A bin topa ku e skuter riba kual e dos hòmbernan a hui. Un persona ku nèt na e momentu ei tabata para na e skuter a keda detené. E no por a duna un splikashon kiko e tabata hasi na e skuter i polisnan a disidí di bai kuné. Tur e personanan den banda tabata bisa ku e hòmber no tin nada di aber. E investigashon i interogashon lo bai saka afó si e tin ròl den e krímen aki òf no. A konfiská e skuter tambe den kuadro di e investigashon. E atrako aki ta parse esun frustra algun tempu pasa tambe den Punda unda dos hòmber a trata di tira un atrako igual. Esaki a keda frustra na momentu ku durante nan eskape, testigunan a logra tene i asta bati nan pendiente yegada di polis na e okashon ei.
