Dos tripulante a fayesé riba barku Nieuw Amsterdam: outoridatnan ta investigá

AMSTERDAM – E Konseho di Investigashon pa Seguridat Hulandes (Onderzoeksraad voor Veiligheid, OVV) ta investigando un aksidente riba un barku krusero di Holland America Line di siman pasa. Riba e barku Nieuw Amsterdam, ku ta nabegá bou di e bandera Hulandes, tabatin un aksidente unda ku dos tripulante a fayesé. Esaki a sosodé den serkania di Bahamas, ora ku algu a pasa den kamber di motor. Segun informashon, tabatin un eksploshon. E barku a sali dia 16 di mart último for di Ft Lauderdale, Merka, pa un krusero di un siman. Manera ta konosí, Holland America Line tambe tin barku ku ta bishita Kòrsou i Aruba.