Despues ku wes a bai tras di engañonan di Sehos: Disputa di 14 mion ainda no ta tras di lomba
WILLEMSTAD. – Despues di un veredikto di Korte ku no a sali na fabor di e Penshonadonan di Sehos, kaminda ku e penshonadonan ta reklamá nan plaka na balor di 14 mion florin ku nan ta di opinion ku Sehos a enrikesé nan mes inhustamente, djasabra awor Komishon penshonadonan Sehos lo tin un reunion general interesante kaminda ku lo bai disidí kiko lo bira e siguiente paso.
Manera ta konosí penshonadonan i èks trahadónan di Sehos a hiba un lucha largu kontra di aktonan inhustu di dirigentenan di èks-Sehos/St. Elisabeth Foundation. A dura hopi pa a logra e kaso den Korte i lástimamente wes mr. Pieter de Kort a duna un veredikto dia 12 di sèptèmber 2022 ku no kai den na fabor di e penshonadonan.
Ounke penshonadonan a presentá diferente prueba konvisente, ku Sehos tabatin e deber di paga gastunan médiko di su penshonadonan, e wes no a tuma konsiderashon ku esakinan i a bai tras di engañonan ku Sehos a trese dilanti.
Despues di hopi esfuerso komishon di penshonadonan a logra pa partidonan enbolbí tene un reunion general ku penshonadonan di Sehos i tur esnan ku tin e derecho di haña e sènnan reservá ku Sehos a poderá di dje inhustamente.
Manera ta konosí Komishon Penshonadonan di Sehos no ta satisfecho ku e veredikto, pa motibu ku nan ta di opinion ku tin aspektonan di mas importante ku nan a trese dilanti, wes no a duna kontesta riba nan. Pues un desishon di wes ku no ta reflehá e puntonan di mas importante tres’é dilanti durante e tratamentu.
P’esei durante e reunion di djasabra próksimo 15 di òktober lo ta presente abogado di e komishon di Penshonadonan i tambe e Konsehero di e komishon sr. Gijsbertha.
Durante e reunion aki lo bai den ekstenso di e veredikto i pa determiná kiko ta siguiente paso lo bira. E komishon lo hasi esfuerso pa representante di CBV tambe ta presente.
E reunion lo tuma lugá na Sentro di Bario Sta. Maria entre 1 or di mèrdia pa 3 or di mèrdia. Ta supliká pa kada miembro bin ku nan stul.
