E promé barku di fruta tei

WILLEMSTAD.-E promé barku venezolano ku ta transportá fruta i berdura a yega Kòrsou. Viejo Nano ta nòmber di e promé barku aki. Na entrada di haf tambe EXTRA a tuma nota di presensia di vários hende ku a risibí e barku aki. E esfuersonan ku Kòrsou a hasi ta inmenso pa logra restablesé e konekshon entre e dos paisnan.

Venezuela a sera frontera di forma unilateral i esei a kondusí ku a presentá e bon momentu pa bai revisá e kondishonnan bou di kua e barkunan tabata bini Kòrsou den pasado. Entre otro a sòru ku awendia mester kumpli ku reglanan di higiena, paga pa utilidatnan i pa logá di stashoná. Premier Pisas na e okashon aki a indiká di ta kontentu ku e desaroyo aki, pasobra ta trata di un relashon di hopi aña entre Venezuela i Kòrsou.

Minister Ruisandro Cijntje enkargá ku Desaroyo Ekonómiko tambe a mustra satisfakshon ku a logra pa e barkunan di fruta i berdura tei bek. Minister Cijntje a yama danki na tur kompania i otronan ku durante di e periodo ku no tabatin fruta i berdura for di Venezuela, ku a sòru pa komunidat di Kòrsou por a sigui haña bon produkto di otro merkadonan.

Mas detaye den edishon di EXTRA.