DEN HAAG, AP.- E eks fiskal general di Venezuela, Luisa Ortega a pidi Korte Penal Internashonal pa investigá presidente di Venezuela, Nicolás Maduro i kuater funshonario mas pa krímennan kontra humanidat.
Ortega a akudí e sede di tribunal mundial djaweps mainta.
E eks fiskal general a bisa ku el a entregá tribunal mas di 1.000 evidensia ku ta vinkulá forsanan di seguridat venezolano ku mas di 8.000 asesinato desde 2015.
Ortega a afirmá ku e gobièrnu di Maduro “mester paga pa e krímennan aki kontra humanidat i tambe paga pa hamber, miseria i penuria ku a asotá e pueblo venezolano”.
El a afirmá ku el a hiba su denunsianan na un instansia internashonal paso na Venezuela no ta posibel pa e kulpabelnan haña kastigu ya ku e partido sosialista gobernante ta dominá e poder hudisial.
Venezuela ta un di e mas di 120 paisnan ku a ratifiká e tratado di kreashon di KPI. Sinembargo, no ta sigur ku e fiskal prinsipal di Korte, Fatou Bensouda, krea lugá pa e pedido di Ortega. Su ofisina ta haña sentenar di denunsianan similar pa aña.
Den pasado, e fiskal a risibí mas denunsia di supuesto krímennan polítiko di outoridat venezolano kontra oposishon polítiko. Na aña 2006 e korte a ninga di inisiá un investigashon, pero a aklará ku por revisá e desishon “si surgi echonan òf pruebanan nobo”.
