LA PAZ, BOLIVIA, AFP.- Eks presidente di Bolivia Jeanine Añez ta stabil, despues ku su famia a informá ku el a purba na kita su bida den e prizòn kaminda e ta detené, segun informashon di outoridat.
Añez a atentá kontra su bida dor di depreshon severo kousá pa prolongashon di su detenshon, segun su yu muhé, Carolina Ribera. Un di su abogadonan a bisa ku esaki ta pa manda “un mensahe di ousilio”.
E eks mandatario interino di 54 aña ta enkarselá desde sinku luna kaba i ta akusá ku genosidio, terorismo, konspirashon i inkumplimentu di deber durante su mandato presidensial di un aña di 2019 pa 2020.
Oposishon a deplorá gobièrnu su trato kontra Añez i a pidi pa laga e eks mandatario den libertat.
Añez a bira presidente den novèmber 2019 despues ku eks presidente Evo Morales a renunsiá i hui di Bolivia. Esaki a desaroyá den vários siman di protesta relashoná ku su reelekshon kontroversial pa un di kuater término komo presidente di e pais.
Despues ku Morales a renunsiá, Añez a huramentá komo presidente interino pero su oponentenan a denunsiá esaki komo un gòlpi kontra Morales.
Añez su gobièrnu a organisá elekshon transparente i pasífiko den òktober 2020, kaminda Morales su protehido Luis Arce a gana. Arce a primintí ku e lo persiguí i akusá tur esnan embolbí den e “gòlpi”.
