WASHINGTON, MERKA, AFP.- Pentágono a duna aerolíneanan prinsipal òrdu pa yuda ku evakuashon di míles di afgano i estranhero di Kabul, despues ku e pais a kai den man di ekstremistanan Taliban.
Pentágono a informá ku sekretaria di Defensa, Lloyd Austin lo apliká Flota Aéreo di Reserva Sivil (CRAF) pa yuda ku evakuashon di tur hende ku yega basenan merikano den Medio Oriente.
“Nos lo hasi tur kos posibel pa tur hende, tur siudadano merikano ku kier sali, por sali”, asina Austin a bisa den un entrevista ku ABC. El a añadí ku meskos ta konta pa aliadonan afgano di Merka.
Diesocho avion sivil di American Airlines, Atlas, Delta, Omni, Hawaiian i Unies lo yuda desénas di aeronave di karga militar ku ta partisipando den e evakuashon.
En bes di drenta i sali di e kapital afgano, e avionnan lo transportá tur persona desde basenan merikano na Qatar, Bahrein i Emirato Árabe Uni pa paisnan europeo i den mayoria kaso, te Merka.
Washington tin míles di sòldat den kapital di Afganistan, pa garantisá seguridat di e aeropuerto. Pentágono a establesé 31 di ougùstùs komo deadline pa kumpli ku e evakuashonnan. Pero Austin a bisa ku posiblemente lo pidi presidente Biden pa aplasá e fecha.
