ATENAS, AP.- E famia di dos persona ku a muri den e kandela forestal mas letal na Gresia den vários dékada a entamá un demanda kontra funshonarionan griego pa e forma kon nan a reakshoná kontra e desaster, akusando nan di asesinato i kargonan pa eksponé e pueblo na peliger.
E víktimanan, dos maestro di 70 i 73 aña, a keda pegá pa e vlamnan di kandela dia 23 di yüli na momentu ku nan a purba hui di nan kas na Neo Voutza, un zona na kosta serka di e region mas afektá pa e kandela, na nortost di e kapital griego, Atenas. E kadaver di e víktimanan a wòrdu deskubrí un dia despues.
Posiblemente 90 persona a muri den e kandela alimentá pa bientu di orkan. E number eksakto mester a wòrdu konfirmá miéntras spesialistanan forense ta traha pa identifiká e restunan di e víktimanan aki.
E departamento di bombero, ku tabata dunando e sifra ofisial di mortonan, a bisa djamars anochi ku e kadavernan di 80 persona, entre nan kuater ku a fayesé den hospital, a wòrdu identifiká, miéntras ocho tabata pèrdí ainda.
Mayoria di e personanan morto a kaba asina kimá ku nan restunan mester di prueba di DNA pa esaki su identifikashon.
E kasá i e yu di e hòmber di 70 aña i e yu di e muhé di 73 a presentá nan demanda kontra e direktor di protekshon sivil na Gresia, e gobernador regional, alkalde lokal i vários funshonario di e ofisina regional di protekshon sivil i di e departamentonan di bombero i di polis.
E demanda ta deskribi ku e hòmber a purba hui pero e no a logra habri e porta debí ku no tabatin koriente. E hòmber i e muhé a pruba hui na pia pero tabata demasiado lat. Nan kadaver a wòrdu hañá 300 òf 400 meter leu di e kas.