SAN VICENTE DEL CAGUAN, COLOMBIA, AFP.- Komandantenan di e desendientenan di FARC a sigurá ku nan ta kla pa kuminsá diálogonan nobo dia 16 di mei ku gobièrnu di Colombia den un intento pa desmobilisá 3 mil gueriero ku ta sigui ara despues di e akuerdo di pas na 2016.
“Nos ta e ehérsito di pueblo” asina e rebeldenan ta bisa den un tradishon puru di e guerieronan bieu di Latino Amérika den kuadro di un konsentrashon popular grandi den e teritorionan bou di nan kontrol den sùit di e pais.
“Nos ta anunsiá na mundu kompleto ku nos delegadonan na e mesa di diálogo ku e estado kolombiano, na kabes di gobièrnu nashonal ya ta kla pa dia 16 di mei di e aña aki” kuminsá ku negosiashonnan di pas, asina e bosero konosí komo Angela Izquierdo a anunsiá riba un tarima den un zona rural di San Vicente del Caguan, departamento di Caqueta.
E komandantenan prinsipal di FARC tabata kompaña e muhé rebelde. Banda di dje, e lider di estado mayor sentral konosí komo Ivan Mordisco i su kombatientenan tabata respaldá e anunsionan ei miéntras míles di persona, kampesinonan, miembronan di e organisashonnan sosial i simpatisadónan di rebelion tabata skucha ku atenshon.
