WASHINGTON, MERKA, AFP.- E Komité di Polítika Monetario di Reserva Federal di Merka a inisiá su reunion di dos dia. Merkado ta sperando un oumento di mitar porshento, e promé di e magnitut aki desde mei 2000, pa purba kontrolá inflashon.
E reunion a kuminsá 10 or di mainta, segun indikashon di e bosero di Banko Sentral na AFP. Preisnan ta subiendo sin stòp desde un aña kaba den Merka.
Inflashon a subi ku 6,6% den 12 luna te ku mat, i preisnan a subi ku 0,9% entre febrüari i luna pasa segun e index di PCE, kual Fed ta sigui.
E otro indikadó di inflashon, CPI, referensia pa kalkulá penshun, a mustra un oumento di preis di 8,5% den 12 luna te ku mart, esun di mas haltu desde desèmber 1981.
Ku preshon fuerte di preisnan ku no ta baha, e presidente di Fed, Jerome Powell, a bisa ku ta esensial pa establesé stabilidat di preisnan i subi tasanan “rápidamente”.
