Sèptèmber ta luna di kolekta di Prinses Wilhelmina Fonds. Pero kiko e fundashon aki ta hasi den komunidat. Sra Frieda Geller presidente di e fundashon a duna nos un splikashon di nan trabounan. Huntu ku e direktiva diario nan ta hasi e trabounan ya ku no ta algu pa un hende so pero ta trabou pa grupo. PWF a keda fundá na 1949 i na novèmber awor nan ta kumpli 73 aña. Sra. Geller a pone atenshon riba e loke nan ta hasi prinsipalmente i esei ta duna guia pa esnan ku tin kanser. Pa por haña nan servisio no tin mester di paga nada, solamente i lástimamente e hende mester tin kanser.
PWF ta hasi loke dòkter no ta hasi
Una bes yega na PWF, un persona einan ta tuma tur dato i un trahadó sosial ta tuma kontakto ku e persona i asina ta hasi un evaluashon di kiko e persona ei mester. E evaluashon i e kosnan ku PWF ta hasi no ta nada ku dòkter ta hasi. Ta kos ku dòkter no ta atendé kuné, eseinan PWF ta hasi. Por ehèmpel algu masha simpel segun sra. Geller ta kon e persona ta yega pa 6 siman largu, djaluna te ku djabièrnè pa por tin transpòrt pa hasi trahamentu na hospital. Esei no ta algu ku fásilmente hende lo pensa riba dje i no ta den man di dòkter pero e ta kai den man di PWF, si e ta bira nesesario. Tin hende tin nan mes transporte. I no ta pasobra si e hende no haña transporte ta hasi su famia un mal famia. Durante di seis siman di djaluna pa djabièrnè transporte un persona pa hospital ta un trabou grandi i p’esei PWF ta regla e transporte aki sin ku e ta kosta e persona ku kanser nada. Di e forma aki a lo ménos PWF sa ku e hende por haña su tratamentu na momentu ku ta kita un peso grandi for di dje. E ta mustra kon grandi e yudansa aki ta; imaginá un dia kalor i e hende tin di bai ku bùs i tambe pa bai kas bèk den solo. E ta algu inaseptabel.
PWF ta duna un man
Den e evaluashon ku PWF ta hasi ta hopi kos ta sali. Komo ehèmpel sra. Geller a bisa ku ora e hende ta bai hasi su tratamentu di kanser, e tin di kome hopi sali i no tur hende tin e presupuesto pa por kumpra tur nan fruta, berdura i pan maron i tur e kosnan ku por tende i banda di dje preisnan ta subi. PWF ta evaluá si e persona ei di bèrdat mester di tur esei, nan ta wak si kada dos siman e persona ta haña kada dos siman, dos saku yen di kuminda salú i esei tampoko ta kosta e persona nada.
Boluntario i profeshonalnan
E presidente tirando bista riba su direktiva para kuné, el a enfatisá ku loke el a menshoná ta posibel danki na e direktiva kompleto ( Frida Geller presidente, Ronice Martis tesorero, Ageeth Termans vise presidente, Grace Goede segundo tesorero, Lillian v d Burg miembro i Maruta Aniseto sekretaris) i nan tur ta boluntarionan sin salario. Tin hende por pensa ku e sèn ku nan ta rekoudá ta pone ku nan por paga salarionan. Nan ta boluntario segun sra. Geller. I unda e sèn ta bai, mayoria ta pa e personanan profeshonal ku PWF tin ku ta hasi e evaluashon, ta duna guia i tur esei PWF mes no por hasi pasobra nan komo boluntario no ta studia pa eseinan. I tampoko por ferwaktu esei di boluntarionan i p’esei nan a skohe 3 trahadó sosial tambe huntu ku un ‘zorgmanager’ ku ta wak tur kos i ta pone su sabiduria den dje. I eseinan si mester paga pasobra ta profeshonalnan. I di e forma aki PWF ta sigur ku ora nan ta bai kas di e persona òf na hospital òf asta na ofisina di PWF, nan sa kon ta atendé ku e pashèntnan.
Pèrdè pechu ta nifiká hopi
Frieda Geller a bisa ku nan no tei solamente pa hende ku kanser na pechu. Ta un persepshon ku ta biba den komunidat i nan ta purba di kambia esei. Prinses Wilhelmina Fonds tei pa tur hende ku tin kualke tipo di kanser tantu pa hende muhé komo hende hòmber. Nan lo ke pa hende hòmber tambe yega serka nan i sigur tin mas ta bin kompará ku ántes. PWF ke yuda mas. Yuda prevení un malesa hopi fèrfelu, difísil, PWF por yuda e persona pasa den dje i asta purba ku e persona no mester a yega einan asina lat. Kanser na pechu no ta solamente pa hende muhé pero tambe hende hòmber ounke muchu ménos. I pa e hende hòmber e no ta fásil pero pa e hende muhé pió ya ku ta e hende muhé ku pèrdè pechu, nan komo hende muhé ta komprondé kiko esei ke men. Ta parti di e hende muhé su kurpa i parti vital i ora pèrdè esei e ta un problema grandi den tu sentido. Na PWF nan tin un banko di prótesis i einan si e dòkter duna un apoderashon, e profeshonalnan ta bai huntu ku e pashènt den un kamber privá kaminda ta buska e fet presis. PWF no ta hasi nada di ‘one size fits all’. Sra. Geller ta kòrda e promé bia ku un persona a pèrdè su pechu i a drenta eiden, e tabata hopi tristu, kabes abou ku bèrgwensa i miedu pero ora a kaba di papia kuné i dun’é un prótesis i su BH, e dama ei a sali un otro persona ku su kara na laira. Esun ku no ta hende muhé no ta komprondé kiko ta pèrdè pechu. Tin ta kere ku ta algu estétiko pero e no ta esei so. E tin un parti sikológiko ku e hende a pèrdè parti di su kurpa i esei nan di PWF ta yuda pa e persona por surpasá e problema promé ku e bista.
No ta eksihí e hende pa djòin
Sra. Geller a pone énfasis ku no ta solamente na ofisina di PWF den Scharlooweg e hende ku mester di e guia i sosten ta yega. Sra. Geller a bisa ku nan tin un persona ku ta traha den ofisina ku ta e promé kontakto di nan. Un hende ku kanser por yega einan kisas e ta yama na telefòn, òf su kasá, ruman, yu, mama por yama tambe i e trahadó sosial ta tuma kontakto kuné. Si e persona por yega einan tambe ta bon biní pero si e ta den situashon ku e no por sali for di kas, nan ta bai su kas. Si e persona ta den hospital tambe segun sra. Geller nan tin akseso tur djárason, un di nan trahadónan sosial ta bai einan na CMC kaminda nan tin nan ofisina i asina por atendé ku tur hende na e manera ku ta sirbi e persona. Nan no ta eksihí nada segun sra. Geller. Nan no ta eksihí pa e hende djòin nan, e hende mester bin serka nan.
Sostené asta famia
Ronice Martis ta tesorero di PWF i el a splika ku nan ta traha huntu ku Stichting Ride for the Roses ku ta hasi nan evento tur aña i aki aya algun aktividat mas pa rekoudá fondo pa PWF. Banda di esei tin hende ku ta hasi donashon periódikamente kisas 10 florin pa luna. Eseinan tur ta entrada pa nan banda di e luna di kolekta. Durante di e kolekta nan ta haña mayoria fondo. Tambe nan sa organisá “Movember” i tambe ta traha ku JCI ku No Shave Movember ku tambe ta trese fondo pa nan. I tin e ‘drive thru fundraising’ den aprel ku tambe ta trese fondo pa nan. Pero mayoria di nan fondo segun Ronice ta di Ride for the Roses i e kolèkt. I teniendo na kuenta tur nan trabounan i kuantu e gastunan ta, Ronice a bisa ku nan tin gana pa e entradanan ta mas. En partikular den temporada di covid kosnan a baha drástikamente mundialmente. Den e temporada di covid tabata mas duru pasobra kolèkt a baha pero e gastunan a keda pasobra hende malu ta keda. Nan ta keda sostené e hendenan ku tin kanser i nan famia. Ku esaki Ronice a pone énfasis ku no ta solamente e hende ku kanser nan ta sostené pero e famia, e yu, e rumannan, tur mester di yudansa. I e kantidat di pashèntnan di kanser ta keda subi i pa no keda sin menshoná ku no ta tur ta registrá serka nan.
Luna di kolèkt
Grace Goede, e segundo tesorero ta enkargá ku kolekta pa PWF. El a splika ku ta for di luna di mart nan ta kuminsá pidi pèrmit i tin aña ta for di yanüari nan ta pidi. I ta nèt promé ku e kolèkt kuminsá nan ta haña e pèrmit. E aña aki sinembargo nan a hañ’é un tiki mas tempran. Nan tin diferente lugá ku ta keda aserká delantá pa nan por pone e buzonnan. Por ehèmpel supermerkado i bankonan, ounke no tin hopi hende ta bai banko mas pero esnan ku bai por yuda. For di aña pasá a kuminsá un proyekto kaminda nan a aserká un skol di SBO pa e studiantenan por yuda kolekta. Antes nan tabatin hopi hopi hende ku awor ta mayor di edat ku ta bai sinta na supermerkado pa kolekta, pero e hendenan ei a subi di edat i mester di hende mas yòn pa hasi e trabou. I e téknikanan ku tin awor aki kaminda por para asta ku mashin di swipe pa hasi donashon. E aña aki tambe PWF a aserká algun skol pa mira kua ta yuda. E loke e studiantenan ta hasi ta sirbi komo parti di e ora di nan stazje. Nan ta siña i hasi algu pa komunidat. Di e forma aki ta spera ku tin bastante hende pa kolekta. I banda di supermerkado i bankonan, PWF tambe tin nan sentro di yamada kaminda hende ta sinta na kòmpiuter, ku lista di nòmber i telefòn i nan ta yama i rekordá e hende ku ta luna di kolèkt i ku PWF tin di bai tuma e sèn òf ta depositá e sèn ei. Mas aleu segun sra. Goede nan tin otro hendenan ta kolektá manera na Sambil tin algun luna, Zuikertuin Mal tambe. Nan tin un lista i ku pèrmit di polis nan ta pone nan buzon pa hasi e kolekta.
Niun pais por drei sin boluntario
E preparashon segun sra. Grace Goede ta ku mester haña hende, mester di nan lista, mester tin bo mes lista, i asta e hendenan ku ta traha den e sentro di yamada tambe a bira ménos. E aña aki tin vários ku nan a bai afó. PWF ta buska manera pa haña mas hende i konsientisá hende pa no lubidá ku tur hende por haña kanser. Trabou boluntario ta algu ku ta krese e persona mes i ta yuda komunidat. Niun pais no por drei sin boluntario. P’esei sra. Grace ta sigui motivá hende pa duna maske ta 2 ora di nan oranan liber pa yuda den nan sentro di yamada òf riba djasabra pa supervisá e studiantenan.
Hasi donashon!
E kantidat di sèn ku tabata haña di kolèkt a baha drástikamente for di 2 aña pasá ku covid a kai aden. I no tur hende ta konsiente ku mester duna i ta bon pa duna pa asina kontribuí. Tin hende ta pasa wak i ta sigui bai ku nan kara leu. Tin hende ta pasa i no ta kontestá esun ku ta pidiendo pa donashon. I e hende ta hasi asina, te ora e kos toka e persona, e ora ei e ta sinti kiko e ta. I no mester yega asina leu segun sra. Goede. E hende di su mes mester kontribuí na komunidat.
