WILLEMSTAD.- E Kompania di telekomunikashon Aquatel mester bira operashonal mas lihé ku ta posibel. Esaki pa por haña e kalidat haltu di servisio di telekomunikashon na un bon preis ku pueblo di Kòrsou meresé, parlamentario pa partido Nashonal di Pueblo, Elvin Gerard ta opiná.
Gerard ta bisa ku e ta sigui risibí keho di klientenan di e kompania Flow riba trato ku nan ta risibí. “Ta bin aserka e kompania ta sigui oumentá su tarifanan miéntras ku e kalidat di servisio ta sigui bai atras”, e ta deklará pa EXTRA.
Pa e parlamentario ta inkomprendibel ku niun mandatario ta kuestioná i hasi pregunta na esnan responsabel pa e mal servisio. “Kon por sigui aseptá e kosnan aki.”
Gerard ta referí na entre otro e anunsio di Flow ku e kompania ta “upgrade” nan sistema di telefòn selular i ku tur telefòn ku ta traha ku e sistema di 2G òf mas bieu lo pèrdè servisio. “Reklamonan ku mi ta haña den wikènt tras di lomba ta ku Flow a paga un parti di su ret, pa ta mas eksakto e teknologia di ret mobil ku ta 2G i ku a kousa ku un grupo di hende, prinsipalmente esnan di edat a pèrdè nan servisio di komunikashon via selular.”
Gerard ta splika ku e hendenan aki mester saka sèn ku nan no tin pa por kumpra un selular ku sí ta traha riba ret mobil di Flow. “Esaki ta un sla bou di faha atrobe pa nos grandinan.”
E parlamentario ta ripití ku na su opinion e servisio di telekomunikashon aki ta deteriorando. “Preisnan ta subi i servisio ta bira mas malu. Nos no por i no ke sigui asina aki.”
Komo solushon Gerard ta urgi pa e kompania Aquatel bira operashonal mas lihé ku ta posibel pa asina trese kompetensia i duna mihó preis i servisio. “P’esei mi pregunta un biaha mas na minister di Desaroyo Ekonómiko, Ruisandro Cijntje ku nunka mi no a risibí un kontesta di dje: Ki dia ta establesé Aquatel i serka kua ministerio di gobièrnu esaki ta pegá i dikon?”
Tambe Gerard ta puntra ken mester tuma akshon pa establesé Aquatel mas pronto posibel. “Mi ke sa esakinan pa yuda pusha pa lanta e kompania i pone nos hendenan ku sa di telekomunikashon bèk na timon i no tiradó di pará manera mi a komprondé ku a buska pa bin bruha tera.”
Segun e parlamentario ta tende riba kaya ku buska trahadó di otro kompania pa bin yuda den Aquatel, “pero, ta kos so e persona aki por brua. Ni kaminda e tabata, nan no ta ker’e. ‘Ojo’ ku e kosnan aki pasobra no por. Esaki tambe mi ta bai investigá i eksponé si tin mester.” Gerard ta enfatisá.
