Di dos morto den tráfiko na Aruba
ORANJESTAD.-Tráfiko insigur a kosta otro bida na Aruba. For di Kuerpo Polisial Aruba EXTRA por informa ku Aruba a registrá su di dos morto den tráfiko pa loke ta trata 2024. Den oranan di djaluna mardugá pa mas o ménos 04:40 sentral di polis a haña notifikashon ku a aksidente a tuma lugá na altura di Nagico na Savaneta entre un outo i un motersaikel.
fotonan kortesia Kuerpo Polisial Aruba
E promé patruya ku a yega na e sitio di e aksidente a topa ku un situashon basta grave. Mesora a pidi presensia di ambulans mirando e situashon di e Shofùr di e motersaikel, pero hopi lihé a ripara ku lamentablemente no por a hasi nada mas pa e víktima. Dr. Texier a konstatá morto di e hóben Maximilian Thomas A. Hernandez Pinedo pa 05:30. E víktima a nase na Aruba 4 aprel 2003 (20 aña).
For di investigashon polis ta splika ku probablemente e Nissan March kolo blou, numerá A-50141 tabata bayendo direkshon pariba i tabata pasando un trùk di Eco-Tech. E motersaikel Susuki numerá MFA-2664 tabata biniendo direkshon pabao i lo a dal frontal den e Nissan March. Den e Nissan March tabatin 4 persona. Tur a haña asistensia médiko na e sitio mes.
E Shofùr di e Nissan March a keda detené pa manehá outo bou influensia di alkohòl ademas e no tin reibeweis tampoko. Spesialista di Tráfiko a presentá na e sitio i tambe polis tékniko pa asina hasi nan investigashonnan. Fiskal, funshonarionan di Slachtofferhulp i asta alto komisario Arnhem a presentá na e sitio pa tuma nota di e aksidente.
