WILLEMSTAD.- Bankero Hulandes Maarten Petermann a sali dilanti komo e finansiero di un bishita hopi remarkabel. Eks-premier britániko Boris Johnson a bishitá luna pasá e presidente venezolano Nicolas Maduro na Caracas. Petermann, kende ta manehá un ‘hedgefund’ grandi na London, tabata presente na e enkuentro. Asina prensa na Inglatera a skibi.
E bishita na Maduro ta sensitivo. E pais ku e reserva mas grandi di petrolio den mundu ta riba e lista pretu pa violashon di derechonan humano. Ademas, Maduro ta wòrdu akusá di tráfiko di kokaina den Estádos Unídos. Kontakto òf komersio ku e pais tin kondishonnan estrikto.
E bishita di Johnson na Maduro a haña atenshon siman pasá. Johnson a bisa den un enkuentro personal ku Maduro ku e no mester entregá arma na Rusia ni di otro manera finansiá e guera Ruso ku Ukrania. Pasobra ta eksistí e temor ku Maduro, debí na e isolashon internashonal di e pais, lo kier reforsá e bandonan ku Rusia.
Johnson tambe a papia tokante e kondishonnan ku Venezuela mester kumpli promé ku e relashon diplomátiko ku e pais por wòrdu restablesé. Johnson ta nenga dilanti prensa britániko ku a trata ‘temanan komersial’ durante e enkuentro.
Ministerio di Relashonnan Eksterior di Reino Uní ta bisa ku ta trata di un bishita ‘personal’ di Johnson. Sinembargo, Johnson, miéntras tabata riba un biahe privá pa Caracas, a bisa ku a mantené informá e minister aktual di Relashonnan Eksterior, David Cameron, via un mensahe di WhatsApp tokante e bishita. Despues di e bishita, Johnson a informá e embahador britániko na Venezuela tokante e kontenido di e enkuentro.
E korant The Sunday Times a reportá ku bankero hulandes Maarten Petermann, tabata presente personalmente na e enkuentro. Petermann tin un interes profeshonal den Venezuela. E manehadó di ‘hedgefund’ ta deseá hasi negoshi ku e debe astronómiko ku e pais tin. El a organisá diferente reunion ku e meta pa normalisá e relashonnan ku e pais.
Petermann a bira konosí komo bankero na JP Morgan. Den e banko ei, e tabata hefe di e divishon ku ta hasi komersio ku sanashon di debe.
Petermann, di 45 aña, a nase na Landgraaf, Limburg. Despues di studiá Ekonomia na Maastricht, el a bai pa London kaminda el a kuminsá un karera bankario eksitoso. Na komienso, el a traha na Goldman Sachs, unda, segun e korant De Limburger, el a traha huntu ku e Prins Friso kende a fayesé na 2013. Mas despues, Petermann a kambia pa JP Morgan, kaminda el a kuminsá traha pa su mes na 2019. E ta biba i traha na London.
