UPDATE: Pisas: gobiernu a kumpra e edifisio Campo
Premier Pisas den un promé reakshon a bisa EXTRA bon kla ku gobièrnu di Kòrsou a kumpra e edifisio. Esei no ta nifiká ku ta Campo Alegre komo sentro di prostitushon ta bai habri bèk.
Tin hopi tempu kaba ku gobièrnu ta sondia kiko ta bai pasa den e kaso di Campo ku e edifisio. Pa gobièrnu a bira tempu pa un desishon kai den e asuntu aki. Un bia mas premier a enfatisá ku gobièrnu a kumpra e edifisio. Pa loke ta trata fondonan ku a usa ta asina ku e plaka ta sali di ministerio di finansa pa fondo di kriminalidat den ministerio di hustisia. Ku otro palabra Kòrsou no a pèrdè nada di e fondonan ei.
Awor ta bai traha pa subi balor di e edifisio. A kumpr’é pa 8 mion pero ora drecha e edifisio esaki por yega 14 mion. E ‘executiewaarde’ ta 8 mion i ku gastunan di mantenshon di 1 mion e total ta yega 9 mion florin.
Premier Pisas a duna di konosé ku ya kaba ta hibando kombersashon ku Konseho di Iglesia i otro gruponan di interes pa wak ki direkshon ta bai ku e edifisio di Campo. Ke men na momentu ku gobièrnu a kumpra e edifisio no ke men ku ta Campo Alegre ta bai habri bèk. E edifisio por haña diferente destinashon.
Gobièrnu mes a kumpra Campo Alegre den findishi
WILLEMSTAD.-Awe mainta a tuma lugá e findishi di Campo Alegre den Renaissance Resort. Ta trata di un findishi ku ta pendiente basta tempu kaba. Tabatin interes di algun grupo pero finalmente gobièrnu di Kòrsou mes a kumpra e kompleho.
Premier Pisas mes tabata presente den e sala. E kompleho a keda bendí pa e suma di 8 mion florin.
Tur hende interesá por a entregá nan proposishon te un dia promé, esta ayera pa asina por a partisipá na e findishi ku a tuma lugá bou di ouspisio di notario Esther Steenbaar di e ofisina Simon & Steenbaar. Ministerio Publiko tabatin poseshon di Campo Alegre promé ku e findishi. Mas detaye ta sigui
