Durante periodo di ehersisio den Region Karibe Hulandes
WILLEMSTAD – Un unidat di genio prosedente di Ehérsito Real di Hulanda tin ehersisionan durante e periodo benidero na Kòrsou i Aruba. E ehersisionan ku e nòmber ‘Caribbean Engineer’ ta kuminsá dia 25 di sèptèmber i tin un durashon di kuater siman.
E unidat, Batayon 101 di Genionan, ta konsistí di genionan/arkitektonan ku tin diferente ekspertisio. E genionan ta militar i alabes spesialisá riba tereno di konstrukshon. Durante e periodo benidero nan ta ehersé un programa ku di un banda ta konsistí di diferente entrenamentu militar, i di e otro banda nan lo ta aktivo ku mas tarea den konstrukshon pa diferente departamentu, entre otro Defensa mes.
Asina e ekspertonan den konstrukshon bou di instrukshon di Carmabi lo bai kuminsá traha den e área di naturalesa na Shete Boka (Kòrsou) riba un toren di vigilansia traha di palu. Den e área di naturalesa na San Wilibrordu (Kòrsou) nan lo instalá un labadó i lo realisá konstrukshon di un kaya den direkshon di un toren nobo di opservashon di flamingo, un toren ku ainda mester keda konstruí. Tambe pa Defensa mes e unidat di genionan lo tin trabou ta hasi. Na Wakawa (Kòrsou) i na Kazèrne di Marina Savaneta (Aruba) e kayanan lo keda mehorá i nan lo kuminsá ku konstrukshon di un edifisio pa drumi ku ofisinanan.
Treinen den sirkunstansianan klimatológiko ku desafionan
Pa e unidat di Hulanda, ehersisionan na Aruba i Kòrsou tin un balor agregá hopi haltu. E sirkunstansianan klimatológiko den Region Karibe Hulandes ta di kompará ku e sirkunstansianan den regionnan di hopi área di mishon. P’esei e ehersisionan aki ta duna e militarnan di ehérsito e chèns pa por trein den sirkunstansianan similar. E unidat ta konsistí di mas o ménos 90 militar ku lo hospedá i keda repartí riba e dos islanan. Pa e aktividatnan di konstrukshon lo transportá 30 vehíkulo (militar) di konstrukshon i 20 kònteiner, riba barku direkshon Kòrsou. E material aki a yega den haf di Kòrsou kaba. E ehersisio ‘Caribbean Engineer’ lo dura te ku 19 di òktober.
