LONDON, AP.- E promé minister britániko Theresa May a anunsiá un gran oumento den e finansiashon di e Sistema Nashonal di Salú.
E ret nashonal lo haña 384 mion libra (510 mion dòler) adishonal pa siman na momentu ku Gran Bretaña sali di Union Europeo desde mart 2019. E anunsio a wòrdu hasí den un artíkulo ku el a skibi i a wòrdu publiká pa e diario Mail on Sunday.
“Awor ku nos ta pafó di Union Europeo i nos no mester hasi aportenan na e sistema di Bruselas, nos lo tin mas plaka pa nos prioridatnan manera e sistema nashonal di salú”, asina e hefe di gobièrnu a skibi.
El a atmití ku e plaka wardá no ta sufisiente pa satisfasé tur nesesidat di e sistema di salú, i a bisa ku mester aprobá impuestonan nobo i pidi mas krédito.
E sistema nashonal di salú tabata sufriendo di skarsedat den añanan resien, spesialmente durante temporada di grip den wenter.
