WILLEMSTAD.- Ministerio di Desaroyo Sosial, Labor i Bienestar a organisá djaweps 18 aprel un diálogo ku gremio sindikal i komersial riba e plannan di reforma sosial menshoná den pakete di pais. Pa mas tardá promé di yüli awor e pakete ku proposishon di reformanan sosial mester ta kla.
E grupo di trabou ku ta traha riba e reformanan a tene un presentashon na partnernan sosial manera sentralnan sindikal i asosashon di komersio i industria, VBC. Den esaki a bini dilanti ku e nivel sosial na Kòrsou ta hopi abou.
A para ketu na por ehèmpel na nivel di penshun di behes i ònderstant. Tambe a mustra ku invershon den seguridat sosial di pais semper ta paga bèk den kresementu ekonómiko.
Presidente di Sentral Solidaridat Sindikal, Frensley Sille ta bisa ku djaluna awor e sentral lo reuní ku miembronan pa pasa e informashon risibí. Tambe ta intenshon ku lo risibí kopia di e rapòrtnan riba e reformanan sosial ku despues di e reunion di djaweps a bira públiko.
Mas despues SSS lo reuní i duna su punto di bista i rekomendashonnan riba e reformanan ku tin riba mesa. Posiblemente e sentralnan sindikal SSS, SKS i CGTC lo sinta huntu pa fiha puntonan di bista komun relashoná ku e reformanan, segun EXTRA por a komprondé.
A base di loke risibí den gremionan sindikal i komersial e ministerio ta sigui traha riba konkretisashon di e reformanan ku mester tuma lugá, Sille ta sigui bisa. “Tabatin punto ku nos tabata di akuerdo kuné pero tambe tin aspektonan ku a pidi atenshon pa nan.”
Sille ta bisa ku adaptashon di leinan laboral ta forma parti di reformanan sosial, pero ku SSS a trese bon kla dilanti ku e adaptashonnan mester na fabor di tantu doñonan di trabou komo trahadónan.
Segun sekretario di estado Alexandra van Huffelen ta krusial pa yega na un pakete di reforma balansá pa logra un sistema sosial pagabel riba término largu. Subi edat di penshun di behes, kon difísil ku esaki ta zona mester ta enfátikamente riba mesa pasobra sin e medida aki riba término kòrtiku no por kubri e gastunan di seguridat sosial.
Banda di esaki mester buska solushonnan adekuá pa e ekonomia informal ku ta forma gran parti di e ekonomia total di Kòrsou. Tambe mester bini ku solushon pa e kantidat grandi di persona no dokumentá, manera refugiadonan ku no tin un pèrmit di trabou.
Den e pakete di pais ku Van Huffelen i promé minister Gilmar ‘Pik’ Pisas a firma resientemente a palabrá ku pa mas tardá 1 yüli awor e pakete ku proposishon di reformanan sosial mester ta kla i presentá den Konseho di Minister. EXTRA a trata di drenta den kontakto ku SSK i tambe asosashon di komersio i industria, VBC pero nan no tabata alkansabel pa komentario.
