WILLEMSTAD.- “Nos tabatin kontakto ku Fundashon pa Konsumidó (FpK). Nos ta tuma tur keho ku nan a risibí i lo bai traha pa solushoná nan. Nos ta lamentá e inkumbiniensia pa nos klientenan.”
Asina direktor general di Flow, Bart Hofker ta deklará den un reakshon riba un karta ku Flow a risibí di FpK ku ta kontené diferente keho di klientenan di e kompania di telekomunikashon. “Si tin keho nos tin ku solushoná esakinan. E oumento di tarifa ta para lòs di esaki i tabata nesesario debí na oumento di gastu.”
FpK ta bisa ku konsumidónan a aserká e fundashon ku kehonan ku ta varia for di e servisio ku nan ta risibí di empleadonan na resepshon, e manera ku ta atendé kliente na telefòn, kehonan di kalidat di instalashon, tardansa den reparashon te na e kalidat di e konekshon di internèt i televishon ku nan ta risibí serka Flow. “Tambe tin reklamonan konstante riba e kantidat di MB ku e konsumidó ta risibí versus e loke e ta paga pe.”
Na opinion di FpK Flow no ta atendé ku su klientenan na e manera korekto. “E frustrashon di klientenan ta hopi, sigur si tene kuenta ku e derechi di eskoho di e konsumidó riba e tereno aki ta hopi limitá.”
Pa FpK ta kuestioná si e subida di tarifa aki ta oportuno i hustifiká mirando tur e reklamonan ku ta risibí tokante di e kalidat di produkto i servisionan ku Flow ta ofresé. “Aunke di otro banda mester bisa ku e kompania ta aktua konforme lei mirando ku e posibilidat di subi tarifa ta pará den e kondishonnan general di e kontrato ku e ta drenta ku e konsumidó.”
Finalmente FpK ta opiná ku ounke un kompania ta liber pa skohe kon e ta hasi su negoshi, e mester keda kòrda i tene na kuenta ku no ta aseptabel ku e konsumidó ku si ta kumpli ku su obligashon di paga pa un produkto òf servisio, no ta risibí e trato i kalidat di produkto ku e ta meresé i tin derechi riba dje.
Relashoná ku e oumento di tarifa Hofker a splika den un entrevista na mart último ku ta kalkulá tarifanan di e kompania a base di gastu pa hasi negoshi. Echo ta ku mundialmente pero tambe na Kòrsou tin inflashon, esta oumento di kosto i Flow tambe tin ku adaptá su tarifanan konforme esaki.
Riba resibu ku a saka na fin di febrüari Flow ta anunsiá ku entrante promé di aprel ta subi tarifanan ku 4,5%. Di e forma aki a informá klientenan adelantá i na tempu di kambionan.
E oumento di tarifa ta solamente pa internèt i televishon. Pa servisio di ‘voice’ no a hisa tarifa. E oumento di tarifa di otro banda ta enserá ku e kliente ta haña mas data riba su telefòn i/òf un spit mas haltu di internèt na kas.
