Marlon Regales:
WILLEMSTAD.- Tabata un sorpresa desagradabel pa Marlon Regales a tende promé minister Gilmar ‘Pik’ Pisas (MFK) bisa durante un entrevista siman pasá ku aworakí e proseso di dekolonisashon no tin prioridat pe. Na 2020 komo e lider polítiko di partido MFK ku tabata den oposishon ainda, Pisas a firma un petishon ku a bai pa e komishon di dekolonisashon di Nashonnan Uní pa pone Kòrsou atrobe riba e lista di paisnan ku no tin un gobernashon propio.
Pa Regales esaki ta otro promesa ku Pisas a hasi ku e no ta kumpli kuné. “Ami no sa kiko mi tin ku pensa. El a firma e karta sin lesa?”, Regales ta puntra.
Regales komo aktivista i den representashon di SEDA (Sentro pa Desaroyo di Dama i su Famia) a lansa e inisiativa pa manda e karta di petishon i kolektá firma pa sostené e petishon. “Caryl Monte a djòin nos inisiativa i a logra kolektá firma bou di gruponan den komunidat, sindikatonan i asta partidonan polítiko inkluso MFK.”
Regales ta enfatisá ku ta tur parlamentario di MFK di e tempu ei a firma e petishon loke ta nifiká ku nan ta di akuerdo ku Kòrsou un dia mester bira bas den su mes kas i pa logra esaki mester kuminsá kana e kaminda pa subi e lista di paisnan sin gobernashon propio. “Pero awor ta bisa ku e proseso aki no tin prioridat, miéntras ku ta e konsehero prinsipal di e aktual gobièrnu mes a yuda pa traha riba e karta di petishon.”
Regales ta sigui bisa ku e no sa ku ta trata di oportunismo òf ku ta bobedat, pero en todo kaso e deklarashon di Pisas ta demostrá ku no tin un direkshon pa pais. “Kasi mi no por a kere e kontesta di promé minister, pero no ta promé biaha ku e ta duna deklarashon kaminda e ta kontradesí su mes”.
Regales ta mustra kon tin video ta bai rònt di Pisas ku a bisa despues di elekshon na 2021 ku Kòrsou no ta manera St. Maarten i Aruba i ku Kòrsou tin sèn, pa mas despues e bisa den kuadro di e reformanan di pais ku esun ku tin sèn trese esaki pasobra no tin sèn. “Un ridikules kompletu i un biaha mas, ta e mes a firma e karta.”
Esaki ta pone Regales puntra su mes si Pisas a firma djis pa manipulá ku opinion i sentimentu públiko òf ta pa loko e ta papia i duna deklarashon. Pa loke ta e petishon na e komishon di dekolonisashon di Nashonnan Uní, Regales ta bisa ku e tin kontaktonan ainda tantu na Nashonnan Uní komo na Caricom ku por sigui lòbi pa e kousa, pero pa e kosnan kana mas lihé ta gobièrnu mester kai aden.
Algu ku sinembargo e no ta mira ta bai pasa. “For di ora ta Hulanda ta disidí riba bo finansa i relashonnan di eksterior, bo no tin gobernashon propio. Kòrsou tin ku pidi Hulanda pèrmit pa e por hiba kòmbersashon ku paisnan bisiña manera Colombia i Venezuela”, Regales ta terminá bisando.
