ATHENAS, GRESIA, AFP.- Gresia kier eliminá karentena pa turistanan vakuná di sierto paisnan desde otro siman, segun indikashon di e gobièrnu djaweps. E meta ta pa aktivá turismo bèk den e pais.
Biaheronan ku yega Gresia aktualmente mester keda den karentena durante shete dia i tambe trese un resultado negativo di tèst di Corona vírus. Mester hasi e tèst den ménos ku 72 ora.
Turistanan israelí ku ya a keda vakuná no mester kumpli ku e rekisitonan aki despues di un akuerdo bilateral.
Segun medionan lokal, e inisiativa a konserní biaheronan di estadonan miembro di Union Europeo i tambe paisnan ku a vakuna gran parti di su siudadanonan manera Reino Uní i Serbia.
Sinembargo, e bosero di gobièrnu Aristotelia Pelonia a bisa ku tur biahero mester sigui e restrikshonnan vigente den Gresia, manera limitashon di trafikashon entre departamentonan den e pais.
Union Europeo ta trahando riba un dokumento di salú ku lo keda introdusí den zomer, kual lo fasilitá biahe di tur europeo ku por proba ku nan a vakuna kontra COVID-19, hasi un tèst di PCR òf Antigen, entre otro.
