WILLEMSTAD.- Parlamento di Kòrsou a kontinuá ku un reunion ku minister Sithree van Heydoorn pa trata desaroyonan relashoná ku F.D.O.K. Un di e puntonan ku a keda trata ta e intenshon di e pelotero yu di Kòrsou Andruw Jones pa bini ku un proyekto na Kòrsou. Minister van Heydoorn a duna di konosé ku e sigur tabatin tur interes i deseo pa papia ku e pelotero yu di tera pa trata na yega otro i asina konkretisá e proyekto.
E minister enkargá ku Deporte, Enseñansa, Siensia i Kultura a indiká e diferente fechanan ku a palabra pero ku finalmente no a logra topa otro debí ku e pelotero tabata kanselá e enkuentronan debí na otro asuntu. Na yanüari di e aña aki a hasi palabrashon na algun okashon sin logra. E pelotero tabata pendiente desaroyonan rondó di ‘hall of fame’ i despues mester a bai train na Arizona pa wega na Venezuela i asina tin otro asuntunan ku a presentá. Den sèptèmber tabatin un anochi lat ku a manda mensahe pa pidi e minister pa e bai un restorant anochi lat, pero e momentu ei ya e minister a drumi kaba. E mandatario ta bisa ku mainta el a mira e mensahe. Ademas e no ta kere ku e sitio lo tabata e mihó sitio pa papia riba un asuntu asina serio manera e tereno pa deporte. A purba i mustra interes na hopi okashon, pero lamentablemente e no a konkretisá.
Pa loke ta trata sèn ku a somentá e minister a bisa ku e kaso ta na Ministerio Publiko. El a manda karta OM pa puntra informashon i e instituto a manda bisa ku e investigashon ta kanando i p’esei no ta oportuno pa duna informashon.
