Korte di Dordrecht
WILLEMSTAD. – Un plan di hopi tempu trahá ta logra su ophetivo, esta asesiná e persona enkuestion, pero e loke ku a sali e asesinonan aki di malu ta ku momentu ku e krímen kometé dia 20 di novèmber 2022 den oranan di anochi lat, tabatin un polis na sivil den bisindario ku a tende zonido di bala. Djis despues di e zonido di bala, e polis a mira un outo pasa ku su lusnan pagá riba velosidat haltu ku el a relashoná ku e zonido di bala ku el a tende. Promé kos ku e polis a hasi, ora el a mira e outo pasa, ta kue e number di outo, koló i modèl di e outo. Mesora el a notifiká sentral di polis ku a sali kuminsá buska e outo aki. Mientrastantu a sali na kla ku e number di outo no ta kuadra ku e modèl. Pues akinan tur sospecho a lanta ku esnan den e outo aki lo tin di aber ku e zonido di bala ku e polis na sivil a tende.
Entre tantu sentral di polis ta haña notifikashon di un kaso di tiroteo ku a tuma lugá riba un lugá di stashoná outo na Zuidland. Einan lo mester tin un hòmber drumi na suela ku un herida di bala i su situashon tabata kritiko. Paramédikonan ku a yega no por a hasi muchu kos pa e víktima ku a fayesé na e sitio.
No a dura mashá ku informashon a drenta ku polis a señalá e outo riba A15 i ta trata di un Peugot 206 shinishi i ku e shofùr no ta duna oido riba òrdu di polis pa para i a start un persekushon formal. Un dado momentu e sospechosonan ta aksidentá ku e outo. A arestá e okupantenan i na mes momentu a tuma tur e medidanan pa protehá pruebanan di stòf di polvo riba man di e sospechosonan dor hinka nan man den saku di plèstik i bui nan. Investigashon ku a sigui a konkluí ku e dos sospechosonan aki tabata esnan ku a asesiná un persona. Den e outo polis a haña arma di kandela, telefòn i tambe plachi di number di outo hòrtá. E loke ku a kaba di inkriminá e dos hòmbernan aki, ta ku den e telefònnan tabatin tur kòmbersashon kon a plania e asesinato aki dianan promé. Esta kon nan ta posishoná nan mes, kua ruta nan ta usa pa hui, kua ruta probablemente polis lo bin i ki ora e víktima lo yega su kas. Pues tur kos tabata mustra riba un krímen perfekto ku lo keda kometé. Pero manera menshoná, nèt e ora ei tabatin un polis na sivil den bisindario.
E sospechoso nasé na Antia Hulandes a bisa ku no te ta esun ku a tira, pero ta e otro a tira i tantu e plan i tur otro kosnan tabata di e otro sospechoso. E hòmber antiano di 37 aña di edat a sigui splika ku e no tabata sa kiko ta bai pasa, ta ora el a mira e amigu tira e víktima, e amigu a hinka e pistol den su man, primi su plant’i man riba e pistol i kore bai. El a spanta i kore tras di e amigu ku e arma den su man i drenta den e outo pa hui.
Korte no a kere e historia aki i den un veredikto di 25 paginá, e tribunal ta konkluí ku e pistolero ta keda kondená na 18 aña di prizòn i e otro ku supuestamente ta esun ku a duna òrdu di asesinato a keda kondená na 20 aña di prizòn.
Den nan dos, nan mester paga e famia di e víktima un suma di 90.000 euro.
Esaki ta e veredikto ku ayera Korte di Dordrecht a dikta.
