WILLEMSTAD – Ayera alrededor di 16.13’or, durante di kontròl di tráfiko riba Caracasbaaiweg na altura di Sorsaka, polis a duna shofùr di un vehíkulo instrukshon pa para. En bes di duna oido na e òrdu aki, e shofùr a sigui kore den direkshon di e agente, ku na e momentu ei pa evitá di keda alkansá, mester a bula na kantu. No opstante e esfuerso aki, e spil di e outo a dal e polis. Mesora e unidat a kuminsá un persekushon tras di e vehíkulo aki ku entre tantu a sigui su rumbo. Riba Seru Loraweg e unidat a detené e hòmber sospechoso A.R.A. di 29 aña di edat nase na Jamaica pa intento di asesinato, despues ku el a aksidentá kontra di un kurá di kas. E vehíkulo a keda konfiská miéntras ku a presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.
