WILLEMSTAD – Meteo a emití un atvertensia pa kalor eksesivo pa Kòrsou. Servisio Meteorológiko Kòrsou a publiká un mensahe di prekoushon (Kódigo Hel). Segun Meteo análisis di pronostiká a indiká un pronóstiko di kalor eksesivo na Kòrsou. E kondishonnan lo dura for di awe 10 or di mainta te awe tardi 5:00 pm.
Impakto antisipá, segun Meteo: “Zonnesteek,” kansansio i kram ta posibel dor di e kayente. Malesa dor di e kayente ta posibel si ekstendé aktividat físiko den kayente òf keda den kalor pa tempu largu.
Medida di prekoushon: Si bo ta hasi kualke aktividat pafó, bebe hopi awa i evitá di mas esfuerso; Si bo no ta sinti bu bon, deskansá den fresku mas pronto posibel.
Un Boletin Spesial ta ser emití pa eventonan di wer ku ta kousa inkonbeniensia general òf preokupashon den pueblo (ku ta rekerí atenshon i akshon di outoridatnan di brantwer i polis) i ku no por ser deskribí na un manera adekuá den un pronóstiko di tempu regular.
