WILLEMSTAD. – Minister Pisas enkargá ku Agrikultura, Medio Ambiente i Naturalesa huntu ku kolaboradónan di Ministerio di GMN djasabra a bishitá diferente área di Banda Bou ku a keda afektá pa e inmenso yobida di djasabra den oranan tempran di mainta. Lokual por a konkluí mediante filmashon di ariba ku drone ta ku e damnan ku antepasadonan a konstruí i ku ta keda mantené pa Ministerio di GMN a hasi nan trabou. E ekseso di awa riba kaminda i na vários sitio tabata a konsekuensia di e asina yamá “flash flood”, kual ta momentu ku áwaseru kai di forma eksesivo durante un korto tempu riba un superfisie relativamente seku.
…Aki por mira dam Kabayé nèt pariba di Hòfi Mango. Por mira e sakadó i ruta di e awa despues ku e dam yena i por mira tambe e dijknan intakto na ámbos banda di e sakadó. E dijk na man robes ta reforsá ku vegetashon…
Por a tuma nota riba retnan sosial ku tabata bisa ku dam lo a kibra na vários sitio. Despues di inspekshon di Ministerio di GMN huntu ku Minister Pisas por konfirmá ku esaki no ta e kaso. Damnan ta funshoná di tal manera ku momentu ku un dam yena, e awa ta sali via un sakadó bai un dam mas abou òf bai laman. Pero, durante un yobida eksesivo e dam por yena den korto tempu i saka e awa rápidamente via e sakadó di tal manera ku por krea e impreshon ku e dam a kibra sin ku esaki ta e kaso. Mester tene kuenta tambe ku e echo, ku momentu ku awa kai di forma eksesivo riba un superfisie seku, e awa ta desplasá su mes práktikamente mes rápido ku riba betòn òf asfalt te na momentu ku e superfisie kuminsá apsorbé e awa.
Meskos ta konta pa e área di Hòfi Mango. Hòfi Mango histórikamente ta riba e ruta ku awa ta pasa momentu ku dam Kabayé yena i saka e awa via e sakadó. Despues di pasa Hòfi Mango e awa ta bai e laguna tras di playa Sta. Cruz i momentu ku esaki yena e ta sigui bai laman. Durante un áwaseru normal, dam Kabayé no ta yena fásilmente i si e yena mes, ta un koriente chikitu di awa ta pasa dor di Hòfi Mango. Pero momentu di áwaseru eksesivo, e awa ta usa e máksimo espasio durante su ruta pa laman. Banda di esaki a bini hopi mas awa aserka for di e serunan rondó di Hòfi Mango i esaki a forma e koriente di awa grandi ku a pasa dor di e hòfi.
Manera ta kustumber, Ministerio di GMN e dianan aki tambe lo sigui inspekshoná estado di e damnan pa asina garantisá ku despues di e yobida eksesivo ku a tuma lugá, esakinan keda funshoná di forma optimal.
