WASHINGTON, AP.- Un hues federal a suspendé e restrikshonnan di Donald Trump su gobièrnu, kual ta ninga asilo na migrantenan ku hui di violensia doméstiko òf di gang den nan pais di orígen.
E hues di distrito Emmet Sullivan a determiná ku algun di e restrikshonnan redaktá pa e eks sekretario di Hustisia, Jeff Sessions, no por wòrdu usa pa proba si un inmigrante tin un historia kreibel di wòrdu persiguí òf torturá den su pais di orígen, kual ta e promé pais pa pidi asilo den Merka. E hues a indiká ku e normanan di asilo di parti e gobièrnu di Trump ta violá e leinan federal di inmigrashon debí ku ta Kongreso mester determiná kiko ta e standardnan pa deportá un persona, i no e kaprichonan di e ehekutivo.
Ta trata di un ‘setback’ legal mas pa presidente Donald Trump, den su intentonan pa enduresé e normanan di migrashon sin pasa via Kongreso.
Funshonarionan di Trump su gobièrnu ta afirmá ku inmigrantenan ta probechá di e proseso di asilo, bendiendo un historia kreibel pa por drenta e pais. Por lo general, solamente 9% di esnan ku pidi asilo ta haña esaki.
E kambio den e polítikanan di migrashon implementá riba 11 di yüni tabatin un impakto inmediato.
Abogadonan di inmigrashon a determiná ku algun persona ku un historia sufisientemente kreibel no a logra pasa e tèst aki i ku huesnan ta rechasando mas apelashon, poniendo fin na prosesonan ku mester dura vários aña.
Personanan persiguí ilegalmente den nan pais di orígen por hasi un petishon pa haña asilo den Merka.
