DEN HAAG/WILLEMSTAD.-Awe 19 di sèptèmber, e di tres djamars di sèptèmber, ta fecha ku gabinete hulandes ounke demisionario a hasi entrega di e presupuesto na Tweede Kamer, Parlamento hulandes. Su altesa rei Willem Alexander kompañá pa su kasa su altesa reina Maxima a lesa e deklarashon di e gabinete demisionario meskos ku gobernador di Kòrsou a hasi riba e di dos djamars di sèptèmber.
Rei Willem Alexander a bisa ku esnan ku para di parti pafó i wak e komunidat hulandes ta mira na promé lugá un pais atraktivo ku kondishonnan sosial formidabel i un ekonomia hopi fuerte anto tur esaki bon fiha den strukturanan internashonal fuerte ku ta duna protekshon i bienestar. Sinembargo tras di e bista bunita ei tin e lucha kontinuo pa lucha pa igualdat perspektiva i seguridat di medionan di bida.
Pa hopi hende ainda Hulanda no ta brinda posibilidat di un bibienda desente, bon salubridat i un ambiente sigur na kas. No ta tur mucha ta haña oportunidatnan igual pa un bon futuro i no ta tur hende bibá na Hulanda ta sinti ku ta skuch’e ni ku ta mir’e. Te ainda tin deskriminashon i eksklushon debí na rasismo den e komunidat hulandes. Esei ta motibu pa kiko mester sigui mantene atendementu ku efektonan di sklabitut haltu riba agènda. Asta despues di e aña di reparashon.
