Tirzo Martha (direktor i ko fundado Instituto Buena Bista)
E wikènt aki Instituto Buena Bista ta habri den kuadro di Open Atelier Route 2024. Ta un oportunidat úniko pa no solamente tuma nota di loke nos hóbennan artista ta produsí, pero tambe pa haña mas informashon i esun ku ke inskribí pa próksimo aña eskolar, por hasi uso di e oportunidat. Den e kuadro aki nos a papia ku Tirzo Martha ku ta direktor i ko fundadó di Instituto Buena bista. El a duna un splikashon di e rekerimentunan pa por drenta serka nan komo studiante i tambe kon nan ta guia i dirigí e hóben asta ora e kaba ku su estudio den eksterior.
Guia asta despues di kaba studia
Instituto Buena Bista ta un skol pa hóbennan ku ke prepará nan mes pa hasi un estudio kreativo. E estudio kreativo por ta diferente kos manera for di arte visual te loke nan ta yama ‘Toegepaste kunst’ manera diseño, arkitektura, hóbennan ku ke hasi estudio di maestro, nan ta duna preparashon pe. E otro pida ku nan ta hasi ta ku nan ta prepará e hóbennan, yuda nan ku e proseso pa nan por mèldu na un akademia, e proseso di toelating na e akademia i e proseso di beka, i otro rekisitonan manera si e hóben no tin sufisiente estudio ta hasi un 21+ toest pa por sigui e estudio. I ora e hóben bai studia nan ta sigui guia nan. E estudionan aki no ta manera esun regular ku ta siña un materia for di kabes i bai traha toets òf eksámen pa esaki. Den kaso di arte hopi kos ta e produkshon, loke ta traha, loke ta invertí den bo mes pa desaroyá bo talento. I e proseso ei tambe nan ta guia e hóben pa e haña su kaminda pa kaba nan estudio i ora nan kaba nan estudio ta yuda nan tambe den nan netwerk pa nan desaroyá nan mes komo artista òf diseñadó òf kualke funshoná kreativo.
E Fábrika
Banda di IBB nan tin e departamento ‘E Fábrika’ i su focus ta riba e hóbennan ku a kaba akademia di arte. Nos tur sa ku ora kaba akademia no ta asina bo tin diploma i solisitá a trabou. E proseso ta otro. Asta esnan den mundu di diseño ke wak trabou. E hóben mester siña desaroyá un portafolio profeshonal, e mester siña desaroyá un netwerk denter di kua e ta funshoná i mester siña desaroyá e mes komo persona kreativo. Tirzo a bisa ku hopi bia nan ta trata na splika e hóbennan ku nan por ta un kopia di hopi kos ku ta eksistí pero e kos importante ta pa bo ta algu interesante, algu spesial i sobresalí. I esei ta loke hende no ta para ketu na dje. Ora a hasi e estudionan kreativo aki ta bai ku ta hasi algu ku ta sobresalí roba e otronan. I pa hasié, e ta eksihí no solamente talento pero mester tin kurashi, un sorto di perseveransia pasobra hende hopi bia ta haña e hende ta bisa ku e no ta komprondé kiko e hóben a hasi òf no sa kiko e tin di hasi ku loke e hóben a traha i ora e hende bisa esei, at e ora ei e studiante ta bon besig. Algu ku hende ta rekonosé por elaborá riba dje i duna komentario pero na momentu ku e obra òf diseño ta bai pasonan mas leu ku loke nos konosé tradishonalmente e hende no sa kiko pa dil kuné.
No tin límite ken por drenta IBB pa studia
Kiko ta e rekisitonan pa por drenta IBB. Tirzo a splika nos di EXTRA Djasabra ku e tin di kuminsá papia di e skol ku e hóben mester. Serka nan no tin un sorto di límite ken por drenta e skol. Den 18 aña di eksistensia di IBB nan a haña hóbennan di Havo, VWO, VSBO, SBO i drop outs ku a resultá einan i ta haña hóbennan di AGO, PBL i ZMLK. Nan a ripara ku por ehèmpel e hóben ku a kai for di enseñansa, no ta nifiká ku nan no por studia pero ta bai ku ta duna nan e kondishon pa nan desaroyá nan mes i asina nan mes ta krea interes den loke nan ke studia. I asina tin hóbennan ku a drop out i a bisa nan ku nan no ta logra nada pero nan a studia, kaba HBO, Master, e sa di un kaso di un studiante asina ku a bin IBB kaminda el a kaba esaki i aña pasa el a kaba su Master. Esei ta algu ku nan a selebrá pasobra e úniko kos ku nan ta tene duru na dje ta ku nan ta kere den talento di e hóbennan, kere den nan kapasidat. Nan ta eksperensia e hóbennan di otro banda i no for di e reglanan tradishonal ku nan tin di haña 10 i 9 pa nan ta bon. Nan a wak si e tin inteligensia, talento, kapasidat, kon pro stimul’é pa e desaroyá eseinan. Nan tabatin un mucha hòmber ku su interes tabata outo i dor di lag’é lesa revista esta bai over na literaturanan ku mas kontenido, a gui’é pa wak kon leu por hiba su interes den outo. Sorto di struktura asina nan ta krea na IBB pa e hóbennan. Ta duna e hóbennan e instrumentonan ku nan mes a krea i desaroyá durante di añanan na IBB pa nan bai dilanti.
Tarea pa drenta IBB
E hóben ku ke drenta IBB tin un tarea ku e tin di hasi. E tarea ta mustra masha simpel. E ta algu kaminda e hóben tin di traha un potrèt di su mes ku ta básikamente simpel pero ku esei por identifiká su manera di wak e mes, su aspekto tékniko, esta si e por pinta òf si ta trahe ku papel òf palu i e habilidat tékniko. Ta wak kon leu nan ta bai ku nan kurashi pa ekspresá nan mes. Nan a ripará serka e hóben ku nan limitashon no ta pasobra nan no por pero e limitashon ta pasobra nan tin henter un sirkulo ku na ta funshoná i nan tin miedu i bèrgwensa den e sirkulo ku por bira ménos si nan sali for di loke ta spera di nan. Si e mama i tata ke pa e bira abogado i e hóben ta sali ku ta pintor e ke ta, e ta haña miedu ku su mayornan ta desaprobá esaki. Einan ta bira e limitashonnan ku e hóben no tin e kurashi di bai mas leu.
Habri pa kosnan nobo
Pa loke ta trata edat, Tirzo a splika ku serka nan ta tuma hóben di 14 pa 27 aña. Pero mayoria bia nan a haña hóbennan di 14 pa 24 aña ku ta un edat ku ta fleksibel ainda ku por yuda nan ku nan desaroyo. I si bo ke hasi estudio kreativo, fleksibilidat ta hopi importante. Bo mester ta habri pa kosnan nobo. Awendia voral ora mira riba retnan sosial nan ta propagá arte komo algu tékniko esta di ken por pinta bon, pero eseinan ta tékniko i no kreatividat. Unda bo ta wak ku e hende ta kreativo ta ora e persona ta pensa den aspekto di komposishon kaminda téknika ta un komponente. Ku músika ta masha realístiko ku ta papia di komposishon pasobra tin di orkestrá tur e instrumèntnan pa nan bin den harmonia ku otro, pa un sorto di zonido spesífiko sali i ku arte ta meskos. E aspekto di komposishon ta masha importante kaminda por mira ken tin talento òf no. Esei ta loke den nan kaso nan ta trata mas tantu posibel pa reta e hóbennan pa nan laga loke nan konosé los i bai di bèrdat loke nan tin komo talento di bèrdat.
Studia na Hulanda
Na IBB e hóben tin di keda minimalmente 2 aña segun Tirzo. I 2 aña pasobra den e promé aña ta un sorto di aña kaminda ta investigá e talento i kalidat di e studiante i den e di dos aña ta traha i desaroyá e talento i kapasidat ei. Por lo general hopi di e hóbennan ta keda 3 aña ku ta mas realístiko. Pero tambe tin hóben ku ta desaroyá asina lihé ku ya for di e promé aña ta kuminsá ku e desaroyo ei. En prinsipio e hóbennan ta bai Hulanda debí ku pa einan ta haña e beka, e kondishonnan di estudio i e proseso ta mas serka di loke nan tin. Den pasado i te ainda IBB tin kontakto ku e akademia di arte na Martinique i nan tin studiante ku a studia einan i a kaba e estudio tambe. Pero pa motibu di beka pa studia einan, el a baha un poko e studiamentu otro kaminda ku no ta Hulanda. E bunita di studia na Martinique segun Tirzo ta ku kulturalmente e ta serka di e muchanan i ounke ta franses e no ta difísil pasobra tin un studiante di IBB a pase ku solamente un lès básiko di franses. E hóben a kaba su estudio te ku Master einan. I na Martinique por hasi HBO i su tras e Master. Tantu e HBO komo Master ta diplomanan rekonosé dor di Union Oropeo. Ta un estudio na mesun nivel ku na Hulanda.
Akademia di kalidat
Un di e kambionan sigur positivo pa IBB den e aña eskolar aki ta ku gobièrnu ta rekonosé IBB. Tirzo a splika ku aña pasá nan a haña rekonosementu di gobièrnu i a haña lisensia. E bunita di dje ta ku nan no ta un kurso pero un sentro di edukashon i esei ta di sumo importansia pa hende sa esei esta ku loke nan ta hasi no ta duna ‘teken cursus’ pero nan ta besig ku enseñansa serio. Den e 18 aña di eksistensia, esei ta e rèspèt ta loke nan a haña di akademianan di arte. E kalidat di e hóbennan ku ta pasa aki ta asina haltu ku dado momentu tabata masha fásil ku si bo ta di IBB bo ta drenta fásil. Ta importante ku a haña e lisensia aki pasobra IBB ta un instituto di Kòrsou i ta di sumo importansia pa Kòrsou karg’é meskos ku internashonalmente ta karga nan. Hopi no ta realisá ku IBB a haña un nòmber internashonal asina grandi ku hopi bia ta pidi nan pa hasi presentashonnan di nan instituto. Aña pasá na Brasil tambe na Fransia, tabatin konferensia grandi aña pasá na Hulanda ku ta haña supsidio i a pidi IBB pa hasi presentashon. Hopi hende no ta imaginá nan mes kon importante i interesante nan ta internashonalmente. IBB ta representá un sorto di kalidat i struktura ku hopi hende ta sigui e struktura aki. Hopi akademia i institutonan a implementá e struktura ku IBB ta usa pasobra nan a krea un forma i un fórmula kaminda ta yuda desaroyá un hóben ku en prinsipio no tin e kapasidat pa bai dilanti i dor di e struktura aki tòg e kapasidat i posibilidat ta bira mas grandi.
Mas entrada den skolnan
Pa loke ta e kantidat di studiante Tirzo a bisa ku e interes a subi. Pero den periodo di covid nan mester a baha e kantidat di studiantenan. Den prinsipio nan tabatin entre 35 pa 40 studiante pero mester a bah’é pero e tabata un lès pa nan pasobra ku e grupo chikí por duna mas atenshon. E sistema ku nan tin ta unu hopi personal i no tur hende ta riba mesun liña. Pa kada studiante nan tin e manera pa atendé a e por desaroyá su mes. E kantidat di studiante a subiendo ounke ta mas mihó si nan por tin un entrada mas habri denter di e skolnan dirèkt. E ta kere ta importante pa desaroyá un konsenshi di kultura, un konsenshi di kon nos ta krea imágennan di nos kultura ku ta yuda nos desaroyá nos mentalidat, amor i apresio pa loke not ta i tin. I p’esei ta di sumo importansia pa tin entrada direkto den skolnan.
Inskripshon a habri
E promé ròndu di inskripshon ta habri riba www.ibb.cw einan por registrá. Mesora ta haña un enkargo pa ehekutá i asina presentá esaki i tin un kombersashon ta sigui i a base di esei ta disidí si e ta bon estudio pa e hóben. Tirzo ke pa tur hende komprondé bon ku nan no ta un hòbi, nan no tei pa pasa tempu, nan no ta ‘naschoolse opvang’ pero nan ta un instituto kaminda e hóben ta bin ku e meta pa bai studia. Nan ta konsentrá riba studiamentu i e hóben di tal manera desaroyá ku e chèns pa kaba ta hopi grandi.
