MIAMI, AP.- Mayoria di esnan ku ta evakuando Miami debí na e menasa di orkan Irma, probablemente tin e trouma ku e region a sufri di orkan Andrew 25 aña pasa.
Jennifer Collins, investigador di geologia na Universidat di Sur di Florida, a bisa ku no ta un eksagerashon pa pensa ku esnan ku ta kòrda orkan Andrew ta imaginando e desaster ku esaki por kousa.
Entre tantu na Tampa, kual no a wòrdu afektá pa Andrew, “tur hende ta preparando rápidamente”. Asina e eksperto a indiká.
Collins a bisa ku segun averiguashonnan, e hendenan ku tin relashon sólido na e sitio lo no bandoná esaki fásil tampoko. Esaki ta debí na e echo ku e hendenan aki ta preferá keda ku famia i amigunan.
Leinan di Florida ta prohibí oumento di preis eksesivo pa artíkulonan básiko den kaso di tormenta manera kuminda, awa, alohamentu i palu. Pero esaki no ta konta pa pasashinan aéreo. Ku Irma rumbo pa Florida, mayoria abitante lokal ta denunsiando oumentonan eksorbitante den ticket di aerolíneanan.
Steve MacQueen, a keda asombrá despues di haña sa ku e mester paga 1725 dòler pa un pasashi pa su mama di 87 aña, kual e kier hiba di Fort Myers pa Charlotte, Nort Carolina. El a atmití ku ora un hende kier kumpra ticket na último ora, preisnan por bira haltu, pero e no a imagin’e ku lo ta asina haltu.
Asina mes el a paga, pa e ta sigur ku su mama por keda ku su ruman muhé na Nort Carolina.
