JERUSALEM, AFP.- Polis israelí a impedí ku un kantidat di manifestante nashonalista hudiu a yega serka di barionan musulman di e siudat bieu d Jerusalem pa evitá konfrontashon ku por provoká un eskalashon entre Israel i e movementunan palestino.
E organisashonnan nashonalista a konvoká un gran marcha den e siudat bieu di Jerusalem, esenario di konfrontashonnan entre manifestantenan palestino i polis israelí den e último dianan, un manifestashon konsiderá komo un gesto di provokashon dor di gobièrnu.
Mas di mil manifestante ku bandera israelí a reuní den e promé oranan di atardi na plasa di Tsahal, serka di e siudat bieu. “Nos ke bai e siudat bieu di Jerusalem, pero nos gobièrnu ta stroba nos di esei”, asina Pnina, un funshonario di 62 aña a bisa miéntras kantidat di manifestante tabata trata na yega serka di e porta di Damascus, e entrada prinsipal pa e bario musulman di e siudat.
Segun un ekipo di AFP na e lugá, polis a blòkia e akseso pa e porta di Damascus pa e manifestantenan, entre nan tabatin vários partidario di e diputado ekstremo di derechi Itamar Ben Gvir kende promé minister Naftali Bennet a prohibí akseso pa e zona den oranan di mainta.
