WASHINGTON, AP.- Ansioso pa kastigá Rusia pa interferí den elekshon presidensial di 2016, Kámara di Representante a aprobá un pakete nobo di sanshon ekonómiko kontra Moscow, kual ta prohibí presidente Donald Trump di retirá sanshonnan sin pèrmit di Kongreso promé.
E legisladornan a aprobá e proposishon ku voto di 419-3, habriendo paso pa esaki yega Senado. Si senadornan aktua rápidamente, e proposishon di lei por keda kla pa wòrdu firma pa Trump promé ku Kongreso drenta den reseso den Ougùstùs. Senado, meskos ku Kámara di Representante, lo por aprobá e medida ku un márgen amplio poniendo ku presidente no por oponé.
E proposishon ta inkluí sanshonnan kontra Iran i Norkorea tambe.
E medida di 184 página ta deskribí motibu di e sanshon komo agreshonnan militar di kremlin den Ukrania i Siria, kaminda presidente Ruso Vladimir Putin a respaldá mandatario Bashar Assad. E ophetivo ta pa sanshoná Putin i esnan yegá di e mandatario enfokando riba korupshon Ruso, violashon di derechinan humano i sektornan vital di ekonomia Ruso, inkluyendo benta di arma i eksportashon energétiko.
Trump a menasá pa rechasá e medida apesar ku sekretario di estado Rex Tillerson i otro funshonarionan di gobièrnu a krítika e rekerimentu di un revishon di parti di Kongreso den kaso ku presidente purba aliviá òf kanselá e sanshonnan.
