LISBOA, PORTUGAL, AFP.- Bomberonan di Portugal a kontené dos kandela di mondi ku a asotá sentro di e pais, kual ta bou di un estado di emergensia debí na e ola di kalor aktual.
E kandelanan a laga 27 persona ku heridanan leve, miéntras ku shete kas i dos struktura agríkola a wòrdu destrosá den e último dianan, segun Andre Fernandes, komandante di protekshon sivil.
“No tin niun kandela grandi aktivo aktualmente pero e situashon ta grave”, asina el a agregá den un rueda di prensa.
E kandela di mas grave a kuminsá djaweps den siudat di Ourem, 130 kilometer na nort di Lisboa. Esaki a kima 2.000 hèktar di vegetashon i alrededor di 600 bombero a keda den e área despues ku a kontené pa vigilá e situashon i evitá ku e kandela ta bolbe bira grandi.
Un otro kandela ku a kuminsá djabièrnè serka di Pombal i ku a destruí 560 hèktar tambe a wòrdu kontené djaluna mainta.
Desde djaweps, Portugal a wòrdu afektá pa temperaturanan haltu ku posiblemente lo subi 45 grado Celsius den algun region e siman aki.
