GEORGETOWN, GUYANA (AFP).- Dos avion di guera norteamerikano a bula djaweps riba Guyana komo parti di un ehersisio militar koordiná entre ámbos pais, loke a hala atenshon di e pais bisiña Venezuela, ku a denunsiá “provokashon i menasa” meimei di tenshonnan pa disputa dje teritorio riku di Esequibo.
“Gobièrnu di Guyana a aprobá e buelo di dos avion F/A18F Super Hornets di Marina di Merka na Georgetown pa dia 9 di mei di 2024”, segun a keda konfirmá pa gobièrnu guyanes den un komunikado, poko despues ku e embahada norteamerikano a informá dje operashon.
“E ehersisio militar aki ta tuma lugá komo parti dje akuerdo kooperashon pa loke ta trata defensa entre Guyana i Merka i ta buska pa profundisá e seguridat den kuadro di un programa di koperashon entre nos dos paisnan”, segun el a agregá.
E kansier di Venezuela, Yván Gil, ta kalkulá ku e buelonan” ta menasá e zona di pas” palabrá entre e presidente Nicolás Maduro i su kolega guyanes, Irfaan Ali, den desèmber durante un momento di tenshon haltu i temor di konflikto armá pa e disputa dje teritorio.
E minister di defensa venezolano, Vladimir Padrino Lopez, a bisa ku e maniobra ta parti di “provokashon” di Merka konsiderá komo enemigu históriko di chavismo.
“Nos sistema di Defensa Aeroespesial Integral ta keda aktivá dirèkt na momento di kualke intento di violashon dje espasio geográfiko venezolano, inkluyendo nos Teritorio Esequibo. Alerta!”, segun Lopez a bisa riba e ret X.
Esequibo tin un ekstenshon di 160.000 km2 i ta riku na petroli i mineralnan. E ta keda atministrá pa Guyana, ounke ku Venezuela ta reklamá e soberania basá riba greisnan for di e tempu ku e pais tabata un kolonia di Spaña.
