SOAB: Splikando Kódigo Corporate Governance
WILLEMSTAD.-Ta importante pa kompania i fundashonnan responsabilisá nan akshonnan i p’esei ta importante pa e komisarionan, direktornan i hunta di supervishon komprondé nan ròl den kada kompania i/òf fundashon. Un kuenta anual ouditá pa un akountent sertifiká ta un bon komienso, ounke por mira ku te ainda tin vários organisashon ku no ta kumpli ku ni esaki. E kódigo Corporate Governance ta un instrumento mas ku mester sirbi komo guia pa dirigentenan, komisario i direktornan kon pa atende ku maneho den e organisashon. ‘Konflikto di interes por sosodé i meskos un hende por tin ‘nevenfunctie’ na momentu ku e ta komisario òf den maneho di un kompania of fundashon. Niun di dos no ta palabra malu.” Na palabra drs. Raymond Faneyte RA CIA CFE CICA direktor ehekutivo di Stichting Overheisaccountant Bureau, SOAB.
SOAB ta rumbo pa selebrashon di nan 30 aniversario. Na kaminda pa e fecha grandi aki e insituto ta organisá diferente evento i resientemente a tene un charla riba Code Corporate Governance. Na e okashon aki direktor Raymond Faneyte a duna splikashon hopi kla riba e diferente aspektonan di e kódigo.
Den último añanan komunidat por a tuma nota kon e echo ku un persona tin kualke otro tarea/funshon (nevenfunctie) mientras ku e ta gobernante of dirigente den un instansia a bira un problema serio. Tin kasonan kaminda ministernan mester a asta bai kas. Meskos ta e kaso na momentu ku detekta ‘konflikto di interes’. E direktor di SOAB ta mustra ku enfasis ku konflikto di interes ni ‘nevenfunctie’ no mester ta palabra malu. Siguiendo e stipulashonnan di e Code Corporate Governance simplemente mester perkura pa informá adelantá ku un dirigente of komisario tin un konflikto di interes pasobra sea e mes of un hende di su famia hopi serka tin laso estrecho ku kompania of hende ku ta bai atende kuné. Nótulonan di e reunion mester indiká bon kla ku e x-persona no tabata presente den preparashon ni toma di desishon riba x-punto. E kódigo ta indiká hopi kla kiko por i bou di kua sirkunstansia.
Tantu komisarionan komo direktornan den fundashon of kompania mester aktua i tene kuenta ku interes di e entidat. E komisarionan mester kumpli ku e tarea di supervishon riba maneho i p’esei ta importante pa e hunta di komisario reuní por lo menos 4x pa aña. Mester focus riba e.o strategia i maneho di riesgo. Ta esensial pa kumpli ku kódigo Corporate Governance.
