WASHINGTON, AP.- Desde ko’i hunga, paña, sapatu i telefònnan selular, e merikanonan ta gasta 500.000 mion dòler anual den produktonan prosedente di China, e sifra mas haltu den importashon di kualkier pais. Esaki ta nifiká ku e preisnan di mayoria di e produktonan aki por oumentá komo resultado di e plan di presidente Donald Trump di imponé sanshon di 60.000 mion dòler na importashonnan di China. Un funshonario di Kas Blanku a bisa ku lo purba minimisá kualkier oumento di preis di pa konsumidónan merikano. Na su lugá, nan a insinuá djaweps ku e impuestonan lo focus prinsipalmente riba produktonan ku ta empresanan ta atkerí i no e konsumidónan. E produktonan aki ta: kòmpiuter, produktonan di teknologia di informashon, mashinnan industrial.
Sinembargo, analistanan ta indiká ku eventualmente mayoria empresa lo pasa kostonan haltu di importashon riba e konsumidónan.
Alrededor di 30 di e kadenanan minorista prinsipal, inkluyendo Big Lots, Costco i Gap i tiendanan manera Kohl’s a skibi un karta pa Kas blanku na komienso di siman pa argumentá ku e “aplikashon di impuesto desde China” por “perhudiká e kasnan merikano”.
