WILLEMSTAD.- Entrante djamars 27 di dezèmber 2022 e tarifa regulá di gasolin i diesel ta baha na Kòrsou. E tarifa di elektrisidat ta baha levemente i awa ta subi entrante djadumingu 1e di yanüari 2023. Esaki Bureau Telecommunicatie en Post (BT&P) ta partisipá den su komunikado mensual riba e partikularidat aki. BT&P ta supervisá e desaroyo di preis di produktonan petrolero i di utilidat.
Den nos edishon di ayera nos a amplia riba e bahada di gasolin i disel.
E bahada drástiko di e tarifanan usuario final pa tantu Mogas 95 komo pa Gasoil LSD ta prinsipalmente pa motibu di un bahada drástiko di e preisnan di kompra den kombinashon ku e komponente Sùrplùs/Défisit.
E kálkulo di e tarifa pa awa i elektrisidat tin dos komponente: e tarifa básiko i e klóusula di kombustibel. E klóusula di kombustibel pa elektrisidat ta konsistí di dos elemento: kompra di koriente i gastunan di kombustibel.
E ‘kompra di koriente’ ta basá riba e preis pa e energia ku tersernan ta suministrá, manera energia di bientu i di solo. ‘Gastunan di kombustibel’ ta enserá produkshon di energia dor di Aqualectra mes.
Tambe e klóusula di kombustibel pa awa ta konsistí di dos elemento, ku ta “kompra” basá riba preis di awa ku ta wòrdu suministrá dor di un terser partido i e gastunan di elektrisidat pa produkshon di awa dor di Aqualectra mes.
Sinembargo, kada luna e uso di e diferente medio pa produkshon – e asina yamá ‘meskla di produkshon’ ta varia. P’esei BT&P ta determiná e balor di e klóusula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di yanüari 2023. Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di novèmber 2022.
BT&P ta determiná e tarifa básiko pa tantu awa komo elektrisidat un biaha pa aña. E tarifa akí ta enserá tur otro gastu (fiho) pa e produkshon di awa i elektrisidat i tambe e gastunan pa e distribushon i e entrega di esakinan, manera gastu di personal, di mantenshon, depresiashon, etc.
E bahada leve di tarifanan di elektrisidat ta resultado di un promedio mas abou di kosto di kombustibel pa produkshon di elektrisidat debí na e produkshon-miksto sperá, bou di kua un parti mas grandi di energia di bientu i un entonashon mas grandi di instalashonnan di produkshon mas barata, i un faktor di korekshon mas haltu ofer di novèmber 2022. E oumento di tarifanan di awa ta resultado di kostonan di elektrisidat mas abou pa produkshon di awa i un faktor di korekshon mas haltu ofer di novèmber 2022.
Aprobashon i fihamentu
BT&P ta asesorá Konseho di Minister (KdM) enkuanto e tarifanan nobo. Solamente despues ku e KdM aprobá e propuesta, e Minister pa Desaroyo Ekonómiko, ku a la bes ta enkargá ku asuntunan di energia, ta fiha e tarifanan. Eseinan ta e tarifanan máksimo ku por usa un luna largu. Ku e prosedura akí, ku ta konsiderá faktornan internashonal i lokal, e supervisor BT&P ta vigilá e entrega di kombustibel, awa i elektrisidat na e poblashon lokal di forma independiente i transparente, pa esaki ta kontinuo i rasonabel.
