ASUNCION.- E delegashon di Kòrsou ayera tabata den akshon den e Weganan Suramerikano (ODESUR) 2022. E biaha aki e disiplinanan di landamentu i vòlibòl di playa tabata den akshon.
Den landamentu Samantha van Vuure a partisipá den e final di 10 kilometer i a marka tempu di 2.14:23.00. Ku e tempu aki el a finalisá na di 12 lugá entre diesnuebe landadó. Nèt su dilanti di isla ruman Aruba, Britta Schwengle a drenta ku e tempu di 2.12:58.00.
Den vòlibòl di playa, Kòrsou a keda representá den e kategoria femenino i maskulino. Den e kategoria femenino, Angjeny Tolentino i Quinna St. Hilaire a mira akshon ora ku nan a enfrentá e duo argentino di Peralta i Najul. Den e promé sèt Tolentino i St. Hilaire ta pèrdè ku skor di 21-10. Den di dos sèt e duo YDK no por a rekuperá i ta bolbe kai ku skor di 21-10.
Awe e duo YDK ta den akshon atrobe ku dos wega. Promé kontra e duo di Bolivia Chacón i Galindo, i mas despues v/s De Brito i Pereyra di Argentina.
Den e kategoria maskulino Kòrsou tin dos ekipo. E duo di Dimanche Elsevijf i Timothy van Henneigen pero tambe e duo ku ta konsistí di Ethwinson Luis i Quinten Anthony. Tur dos ekipo ayera tabata den akshon. Elsevijf i Henneigen a enfrentá Massare i Melgarejo di Paraguay. E duo paraguayo a kue e promé sèt fásil ku skor di 21-9. Den e di dos sèt e duo YDK a lusi mas mihó, pero finalmente a pèrdè ku skor di 21-16.
Ethwinson Luis i Quinten Anthony a enfrentá e argentinonan Amieva i Aveiro kendenan tabata muchu pa esun di Kòrsou, sigur mirando e skornan di 21-6 i 21-7. Tur dos duo di Kòrsou lo ta den akshon awe un biaha mas.
Awe tambe e atleta Glenka Antonia lo kuminsá su partisipashon den e disiplina di bula haltu, pa despues kompetí den bulamentu leu.
Kòrsou i Sürnam ta e úniko dos paisnan ku ainda no a logra medaya den e kampionato aki. Brazil ta na kabes di e tabla di medaya miéntras ku Aruba ta okupá e di 10 lugá.
…Glenka Antonia, e speransa di Kòrsou den atletismo…
