Kriadó di porko selfmade

Djis un tiki pafó di Barber, tras di e kas kaminda el a lanta, Avienne de Aquino (nasé na aña 1989) tin su finka di porko. Na aña 2007 ta aki e ta kuminsá chikí ku mas o ménos 15 porko so. Na e momentu ei, e tabatin 18 aña. Avienne tin diferente djòp ku e ta gana su sèn kuné. E ta traha den hóreka, e ta elèktrishèn, anto e ta bombero na refineria. Ma nunka e no ta lubidá loke realmente e ke: su propio finka. Awor 15 aña despues M.J. Farm tin lugá pa 400 porko. M.J. Farm ta realmente un negoshi di famia. ‘M’ ku ‘J’ ta e promé lèternan di nòmber di su mes yunan.

Avienne ta desendiente di un famia di kunukero kurasoleño. Komo mucha e tabata kana rònt riba e mesun tereno akí mei mei di e kabritu ku karnénan di su mayornan. Su wela i tawela tabatin galiña ku porko. Famia De Aquino ta pasa tur konosementu i eksperensia di generashon pa generashon. Esei ta forma e base. No ta posibel pa studia agrikultura na Kòrsou. Pues Avienne ta buska informashon riba Internet, den buki i e ta tuma kontakto ku kunukero i produktor di alimento den eksterior. Asina e ta siña. Ta di e manera ei gradualmente M.J. Farm ta haña su forma.

 

Kriamentu di porko ta e promé paso. Avienne ta trahando pa bin ku un negoshi biológiko miksto. Un finka, o manera e mes ta bisa un farm, kaminda e tin krio di bestia manera porko, galiña (pa nan karni) i karné. Un finka kaminda ta produsí e kuminda pa e bestianan, kaminda ta re-usá shushi mas tantu ku ta posibel, anto kaminda e bestianan tin sufisiente espasio. M.J. Farm ta para pa karni fresku di alta kalidat.

 

 

Trahando 24-7

“Promé kos ku mi ta hasi mainta ta kontrolá ku e bestianan i tur kos den kurá ta bon. Kaba mi ta limpia tur chiké i kouchi. Importante ta pa tur kos ta bon será i ku e bestianan ta seif. E bestianan ta haña kuminda, anto si tin algu ku ta kibrá, nos ta sòru pa drech’é. Tambe nos ta sòru p’e bèrduranan ku tin plantá na e tereno. Entre 12 or di mèrdia i 4 or di atardi mi ta tuma un pousa. Kaba mi ta sigui ku e rutina: limpia chiké, drecha kuminda i partié rònt, mantenshon, kuida e matanan. Anochi di 8 pa 10 mi ta bolbe sosegá, pa kaba pasa bai Bándariba pa tuma sobrá di kuminda na e hotel- i restorantnan. Meianochi mi ta kore bai Barber bèk. Korekto, asina kos ta bai tur dia, anto hinter siman.”

 

Esei ta e dianan ‘trankil’. Pasó sinku dia pa siman Avienne tin warda entre 7 or di mainta pa 3 or di atardi, di 3 pa 11 or di anochi òf di 11 pa 7 or di mainta komo bombero na refineria. E ta sòru pa e buska e sobránan di kuminda promé òf despues ku su warda.

 

“Kon mi por? Ami ta perseverá! Esei a trese mi kaminda mi ta awendia. Semper mi tabata ke tin mi mes farm ku bestia. No ta dura masha tempu mas pa mi por stòp ku mi trabou na refineria. Aki na farm lo bin un restorant, anto lo bende nos produktonan. Nos ta organisá evento tambe. Tur eseinan huntu lo trese sufisiente entrada.”

 

‘Esaki ta mi bida’

“Kriadó di porko. Esei ta mi bida. Mi ta hasié ku hopi amor. Ora mi yega mi farm mainta tempran, mi no ke bai mas. Mi stima e ambiente. Mi ta felis aki ku mi porkonan. Ora mi porkonan ta saludabel, ami ta kontentu. Semper mi ta purba hasi algu èkstra pa nan, pa nan por ta mas kómodo ku ta posibel. Bo no mester hasi esaki pa sèn so, pasó e ora ei bo no ta sobrebibí. Ta un responsabilidat grandi. Konstantemente bo mester ta alerta pa tene tur kos bou’i kontròl.”

 

“Mi tin mas ku binti aña ta traha ku bestia. Loke otro hende bisa mi i mi lesa den buki òf internèt ta importante, pero alfinal ta mi mes tin ku hasié. Ami a hinka mi farm na mí manera den otro. Bo tin mester di un bon espasio, anto esaki mester ta seif. A yega di sosodé ku un porko a haña un ata’ki kurason. Den solo kayente bestia por deshidratá lihé. Awor mi ta sòru pa sufisiente sombra i un dushi temperatura.”

 

M.J. Farm na 2023

• 250 porko
• 60 porko hembra
• 9 porko machu
• Tres rasa: Duroc, Yorkshire, Landvarken hulandes
• Kuater rei di chiké parsialmente habrí

 

Duradero i sin shushi

M.J. Farm su filosofia ta pa produsí ménos shushi i usa mas tantu produkto lokal ku ta posibel. Nan ta usa e mèst ku ta saka di e chikénan, mesklá ku awa i nutriente èkstra, pa e tera den e finka. Blachi i taki di e palunan di papaya i bakoba ta wòrdu usá den kuminda di e bestianan.

 

Avienne ta skohe pa kultivo lokal ku tin sufisiente proteina i mineral manera maishi, soya i maishi chikí. Ku esakinan e ta drecha un kuminda pa porko sumamente nutritivo i riku na fibra. Riba e tereno tin dos mashin ku ta kòrta e kultivo seku na pida pida. E ta laga e sas para fermentá un tempu. Di e manera ei nan tin mas suku.

 

Spesial pa e finka di porko tin diferente hotèl i restorant ta kolektá e sobránan di kuminda den barí. Den su pikòp Avienne ta transportá e karga balioso akí di Bándariba pa Bándabou. Na su finka e ta saka tur loke no ta komibel afó. Loke sobra e ta meskla den un mekser den e kuminda nutritivo ku el a prepará promé. E bestianan ta kome masha dushi mes!

 

Pa kuminsá un porko ta kome tur kos i e no ta vegetariano. Tur sobrá di karni ku Avienne ta haña serka e restorant- i supermerkadonan, ta haña un trato special. Promé e ta kushi nan pa kuater ora largu, den un wea grandi ku e mes a traha. Di e manera ei e ta mata kualke bakteria ku por ta presente. Ora e karni ta kushí e ta laga e karni stoba hinter dia na temperatura haltu. E ta terminá e sòpi poniendo yerba fresku manera orégano i lamungras aden. ‘Haute cuisine’ mes mes e dama- i kabayeronan akí ta haña.

 

Dòkter Avienne

Un porko grandi ta kome 5 kilo di kuminda òf mas.”En realidat un yu di porko ta meskos ku un bebi”, Avienne ta bisa. “Kada dos pa tres siman, bo ta duna nan mas di bebe i kome. Mi tin un tabèl ta usa i mi ta wak kua bestia tin mester di mas òf kua ta haña muchu tiki.”

 

Avienne ta usa tur su konosementu di kuminda i kuido di porko. Pero e ta adaptá loke e sa na e sirkunstansianan di Kòrsou. E ta deskubrí mata i yerba ku e por usa komo remedi natural. Por pensa akí riba noni, sentebibu i konofló.

 

Despues di tantu aña e ta parsialmente e dòkter di su bestianan tambe. Avienne sa ki ora nan tin mester di kua remedi. E por i ta pasa su bestianan angua i sterilisá e embranan. Tres dia despues ku nan a nanse e ta duna e yunan di porko nan promé bakuna ku heru i vitamina. Konstantemente e ta kontrolá salú di e porkonan. Servisio Veterinario ta kontrolá e pupu di e porkonan pa wak si nan tin parasit òf bichi. Anto si ta nesesario e bestia ta haña antibiótiko, pero ora por preferiblemente un remedi natural.

Promé ku tur kos ta higiene

Kasi nunka e porkonan di kriadó Avienne de Aquino ta malu. Nan ta biba den chiké amplio i masha limpi. Esakinan ta wòrdu limpiá dos biá pa dia, anto nan ta parsialmente habrí. Konstantemente tin bientu fresku ta supla den e chikénan. Pues ei kasi no ta hole stinki. Asta ta asina ku ya diferente biá a tene fiesta rondó di e chikénan. Pero sí ku reglanan estrikto. Avienne ta sòru pa limitá kontakto direkto ku e porkonan. Pasó ta posibel ku asína asina un bishitante, un pushi òf kachó ta trese un bakteria òf vírùs. Un parasit bou di un slòf por tin konsekuensianan fatal. Promé ku bo sa tur porko ta infektá. P’esei prevenshon i higiene tin alto prioridat.

 

Machu di reproduktshon

E nuebe machunan tin ún tarea so: dek e embranan eksitá i fértil. E machunan akí tin nòmber manera Pancho, Pedro i Terorista. Nan a nanse na e finka mes òf a wòrdu kumprá na Kòrsou. Sin nan sémen e produkshon ta stanka. Dependiendo e demanda tur siman tin mas o ménos 15 porko ta bai Parera pa wòrdu matá. Yu di porko na lechi di 10 kilo te porko adulto di 115 kilo. Ta esensial pa por tin yu di porko konstantemente. Bida di e machunan no dushi fásil. Tur siman tin sigur shete dama ta warda ansioso riba un machu. Pues ta laga e machu den e chiké di e embra pa e machu dek e. Durante e fertilisashon ta laga naturalesa hasi su trabou.

 

Gym pa embra priñá

Embra di dek ta wòrdu malkriá masha na M.J. Farm. Meresidamente! Ta danki na e hembranan akí e finka por keda suministrá karni. Tin biá nan ta haña diesdos i asta diesnuebe yu. E periodo den kua e porko ta priñá ta dura tres luna, tres siman i tres dia. Den e periodo ei e embranan ta kana pafó riba un tereno spesial pa nan parti patras di e finka. Aya nan por kana i drumi den lodo. Movementu ta bon pa tene nan saludabel i ta evitá ku nan ta haña por ehèmpel problema di pèlvis. Tres siman promé ku e mester pari, mama porko ta bai su chiké. Despues di a nanse e yunan ta keda algun siman serka nan mama.

 

Karni porko fresku

E porkonan ta krese ku bon kuminda, sufisiente espasio i den un ambiente saludabel. Bo por purba tur esaki den nan karni. “Mas biológiko e produktonan ku e porkonan ta haña ta, mihó e kalidat dje karni”, Avienne sa di eksperiensia.

 

Na e finka e porkonan tin un bida dushi i relahá. E kuido optimal akí ta sigui te na e último momentu. Nèt promé ku nan bai abatuar nan ta wòrdu bañá i nan ta drenta subi e treiler trankil. Na kaminda nan ta wak rònt kurioso. Ora nan yega abatuar Avienne i su yu hòmber ta duna nan un tiki awa. Kada porko ta haña un marka na su orea. Karni di M.J. Farm ta sali abatuar bai hotèl, restorant i supermerkado mesora. Ora nan tin pedido nan sa bende pakete di karni tambe. Pues karni fresku fresku!

 

Mihó i mas grandi

De Aquino ke bai mas aleu. E tin kontakto ku un kompania na Oropa pa kompra di un instalashon di gas. E gas di metano ku ta sali for di e mèst ku e porkonan ta produsí, e por usa komo fuente di energia. E mes ta paga e invershon. Aworakí entre e chikénan tin kouchi spesial pa parto. E mes a traha nan. Sa sosodé ku un mama – ku por pisa 180 kilo – sin ku e por yuda, ta kai drumi riba un yu. Ku e chikénan spesial pa parto e yunan ta seif.

 

Kon ku ta, Avienne tin mester di mas espasio pa por krese. Ta p’esei e ta buskando un tereno pa kultivo. Asina e por konstruí mas chiké riba e tereno tras di e kas di su mayornan. Anto asina e por realisá su plan pa su restorant i su propio karniseria.

 

Promé e finka di porko mester funshoná optimal i stabil. Avienne de Aquino mes ta hasi gran parti di e trabou. E ke pasa e konosementu i eksperensia ku e tin pa un hende ku tin mes tantu amor pa e fishi kuné. Asina e persona por sigui hasi e trabou ku e filosofia di M.J. Farm. Tiki tiki pero sigur e ta trahando pa e por tin e finka ku e ta soña kuné ya pa hopi aña: un finka mesklá, sirkular i duradero ku porko, karné i galiña.

 

 

(CITATEN)

 

Mi a hinka e farm na mi manera den otro

Ora mi bestianan ta saludabel, ami ta sinti mi bon

Mi porkonan kasi nunka ta malu

 

(STREAMERS)

 

Tin un plas di lodo pa e embranan ku ta dek

Bon kuminda, sufisiente espasio pa e bestia

Mas tantu biológiko ku ta posibel

Nuebe machu pa reprodukshon