Stanley Ignacio: miéntras no tuma akshon situashon “wild wild west” lo kontinuá
WILLEMSTAD.- Ayera un señora peaton mester a lucha pa su bida na momentu ku tres kachó di rasa Pitbull a atake. Esaki a sosodé den Kaya Pronoia na Jongbloed den oranan di mainta na momentu ku e víktima, un señora di nashonalidat Hamaikino tabata kanando ta bai su trabou.
Polis a informá ku na nan yegada, nan a topa un dama ku algun herida grave di morde di kachó. E tabatin morde na pia, kurpa i kara. Polis ta informá ku for di investigashon ku a hasi na e sitio a sali na kla ku e dama aki tabata kanando den e kaya ariba menshoná i di repente e kachónan di rasa “pitbull” a sali for di un kura di kual su porta tabata habrí i a ataka e dama severamente.
Ku ambulans a transportá e dama pa Sala di Emergensia di C.M.C. pa risibí tratamentu médiko avansá. E doño di e kachónan tambe tabatin herida di morde.
Segun EXTRA a komprondé, ta trata di tres kachó Pitbull ku a Sali for di un kura di kas. Tin papia ku e porta di kura tabata habri i di otro banda ta bisa tambe ku e kachónan a Sali for di bou di waya di e kura di kas.
E víktima, un señora di 56 aña tabata kanando riba rant di e labadó pega ku e kas, bayendo su trabou. E kachónan a bin riba dje, bent’e abou i einan a morde rònt su kurpa. Heridanan formal na man, pia, kurpa i kara kompleto. Ora ambulans a yega e señora tabata grita di dolo. A transporte pa sala di emergensia di CMC. Te ku ayera tardi ku EXTRA a buska informashon, nos a komprondé ku ainda e señora tabata den sala di operashon.
EXTRA a papia ku Stanley Ignacio, polis ekstraordinario enkargá entre otro ku asuntunan di animal i manera el a bisa nos, el a keda di shòk di loke el a mira. Ta promé bes e ta mira un hende morde di e forma aki.
Stanley Ignacio ta basta indigná ku e kaso aki pero mas ainda pasobra ta konstantemente e ta mustra riba e situashon di kachónan ku ta kana rònt riba nos isla i tambe riba e lei di animal ku te ainda no por atendé kuné manera mester ta. “Miéntras outoridatnan no tuma medida, nos ta keda lamentá situashonnan asina’ki”, segun Ignacio.
Tur dia tin haña keho ku outoridatnan polisial no por atendé, pasobra no tin guia ofisial di OM riba e lei nobo di protekshon di animal. Tabatin reunionnan den e direkshon aki, ku no a kontinuá mas. Kehonan ta keda drenta tur dia.
“Nos leinan ta bisa ku pa tin kachó i sigur di rasa peligroso mester tin kura hermetikamente sera. Na mayoria kaso kaminda ta konosí ku kachó ta Sali i agredí hende riba kaya, ta resultá kue kura no ta hermetikamente sera manera lei ta bisa”.
Kuránan kaminda wayanan ta suak i kibra, ku kachó ta drenta i Sali manera e ta haña ta bon. Resien segun Stanley Ignacio tabatin 3 kaso den área di Sta Helena kaminda un dama a keda gravemente herida i te awor despues di 4 luna no por restablesé na su trabou.
E kaso di ayera mainta ta unu kaminda na vários okashon tantu bisiñanan i abitantenan di e bario a notifiká doño di e kachónan, ku nan ta sali riba kaya i nan ta kore tras di hende. E señora doño di e kachónan segun Stanley Ignacio a konfirmá ayera mainta ku e sa ku e kachónan ta Sali i ayera nan a bolbe Sali i agredí e peaton.
Doñonan di kachó mester bira konsiente di e konsekuensianan ku e situashonnan aki ta trese kuné. Banda ku e víktimanan ta keda ku leshon pa bida, tambe nan tin gastunan ku e doñonan di kachó tin di kumpli kuné. E señora di ayera tabata di tal gravedat morde ku no sa kon e lo bai keda despues, segun Ignacio a bisa EXTRA.
Ayera mainta ora e kachónan a ataka e señora, esaki a kai abou i kachó ta sigui ataka ora e víktima ta na suela abou. Esei tabata e kaso algun aña pasa na Kenepa ora un kachó a morde su doño mata.
Banda di tur esaki ta bin aserka ku tin un lei for di 2008 k ta bisa ku kachónan peligroso den e kaso aki sigur Pitbull mester keda sterilisá si ta muhé i pa e machunan kastra. Banda di esaki e kachó mester haña un che pa e por keda registrá. A duna un tempu di grasia pa doñonan di e kachónan aki aktua i despues lo a kita tur kachó kaminda e doñonan no a hasi manera e lei ta bisa. Tabatin akshonnan e promé 4 luna i despues e lei a bai den Doofpot. I awor por mira den korant, riba facebook i tur kaminda di benta di kachó Pitbull siendo ta prohibí pa e kachónan aki reprodusí i miéntras tantu hustisia no ta aktua. Intenshon di e lei ta ku despues di aña lo no tin mas Pitbull na Kòrsou.
Pero e situashon aktual ta diferente i ta birando un Wild Wild West sin akshon di outoridatnan.
Lei ta bisa tambe ku e doño ta responsabel pa kualke akshon di su kachó manera den e kaso di ayera. E tres Pitbullnan di ayera a keda eliminá mesora. I segun Stanley Ignacio, esei mester bira e akshon ku Ministerio Públiko mester ehekutá, esta eliminá tur kachó ku ataka hende, mesora.
